నేటి నుంచి కొమురవెల్లి మల్లన్న జాతర ప్రారంభం

కొంగు బంగారమైన కొమురవెల్లి మల్లికార్జున స్వామి వారి జాతర ఈరోజు (జనవరి 19) నుంచి ప్రారంభమవుతోంది. సంక్రాంతి అనంతరం మొదటి ఆదివారంతో మొదలయ్యే ఈ జాతర, ఉగాది ముందురోజు ఆదివారం వరకు సుమారు 64 రోజుల పాటు జరుగుతుంది.

ప్రతి ఆదివారం విశేష కార్యక్రమాలు నిర్వహించబడతాయి. భక్తులు బోనాలతో ఆలయానికి చేరుకుని స్వామి, అమ్మవార్లకు నైవేద్యం సమర్పిస్తారు. ముఖ్యంగా పట్నం వేడుకలు, కల్యాణం నిర్వహించి మొక్కులు తీర్చుకుంటారు. ఈ ఉత్సవాల్లో నాలుగు ప్రధాన ఘట్టాలు ఉంటాయి.

భక్తుల రద్దీ

తెలుగు రాష్ట్రాలపాటు మహారాష్ట్ర, కర్ణాటక రాష్ట్రాల నుంచి వేలాది మంది భక్తులు తరలివస్తారు. ఈ జాతరలో హైదరాబాద్ నుంచి వచ్చే భక్తుల సంఖ్య ఎక్కువగా ఉంటుంది. అందుకే తొలి ఆదివారం పట్నం వారంగా పిలుస్తారు. సోమవారం తోటబావి సమీపంలోని కల్యాణ వేదిక దగ్గర పట్నం, అగ్నిగుండం వేడుకలు జరుపుతారు. అధికారులు అంచనా ప్రకారం, ఈ రోజుల్లో ఆలయానికి 1.5 లక్షల నుంచి 2 లక్షల మంది భక్తులు వస్తారు.

అగ్నిగుండం కార్యక్రమం

జాతర ముగింపు సందర్భంగా జరిగే అగ్నిగుండం వేడుక ప్రత్యేక ఆకర్షణగా ఉంటుంది. ఈ ఏడాది మార్చి 23వ తేదీ రాత్రి ఈ కార్యక్రమం నిర్వహించనున్నారు. భక్తులు రాత్రంతా జాగరణ చేస్తూ అగ్నిగుండం వేడుకలో పాల్గొంటారు.

పెద్ద పట్నం ఘట్టం

జాతరలో ప్రధాన ఘట్టమైన పెద్ద పట్నం ఈ సారి ఫిబ్రవరి 2వ తేదీ అర్ధరాత్రి నిర్వహించనున్నారు. మహాశివరాత్రి పర్వదినాన్ని పురస్కరించుకొని జరిగే ఈ కార్యక్రమం ప్రత్యేక ఆకర్షణగా నిలుస్తుంది. చౌదరీలు, ఒగ్గుపూజారుల ఆధ్వర్యంలో 50 గజాల వైశాల్యంలో పట్నాలు వేస్తారు. మల్లన్న స్వామి ఉత్సవ విగ్రహాన్ని ప్రతిష్ఠించి, ప్రత్యేక పూజలు చేస్తారు. ఆ తరువాత అర్చకులు ముందుగా పట్నం దాటి, తర్వాత భక్తులు స్వామివారి దర్శనం చేసుకుంటారు.