సింగపూర్ దేశ పర్యావరణ శాఖ మంత్రి గ్రేస్ ఫూ హైయిన్ తో సమావేశం

 

సింగపూర్ పర్యటనలో ఉన్న తెలంగాణ రాష్ట్ర ముఖ్యమంత్రి ఎ.రేవంత్ రెడ్డి నేతృత్వంలోని ప్రతినిధి బృందం ఆ దేశ పర్యావరణ శాఖ మంత్రి గ్రేస్ ఫూ హైయిన్ తో సమావేశమైంది. ఈ సమావేశంలో ఇరుపక్షాల మధ్య తెలంగాణలో ఉన్న పెట్టుబడి అవకాశాలు, భాగస్వామ్యాలపై విస్తృత చర్చలు జరిగాయి. తెలంగాణలోని పట్టణాభివృద్ధి, మౌలిక సదుపాయాల కల్పన, నీటి వనరుల నిర్వహణ, నైపుణ్యాల అభివృద్ధి, క్రీడలు, సెమీకండక్టర్ల తయారీ, పర్యావరణ పరిరక్షణ, స్థిరత్వం, సాంకేతికత వంటి కీలక రంగాలలో సహకారానికి అనువైన అవకాశాలను వివరించారు.

ఈ చర్చల్లో ముఖ్యమంత్రితో పాటు ఐటీ & పరిశ్రమల మంత్రి దుద్దిళ్ల శ్రీధర్ బాబు, రాష్ట్ర ప్రభుత్వానికి చెందిన ఉన్నతాధికారులు, అలాగే సింగపూర్‌లో భారత డిప్యూటీ హై కమిషనర్ పూజ ఎం. టిల్లు పాల్గొన్నారు. ఈ సందర్భంగా తెలంగాణ ప్రభుత్వం చేపడుతున్న #TelanganaRising లక్ష్యాలు, వాటిని సాధించేందుకు అమలు చేస్తున్న కార్యక్రమాలపై సింగపూర్ మంత్రి ఆసక్తి చూపారు.

సింగపూర్ ప్రభుత్వం ప్రధానంగా నెట్ జీరో ఫ్యూచర్ సిటీ, మూసీ పునరుజ్జీవన ప్రాజెక్ట్, నీటి వనరుల సమగ్ర నిర్వహణ, స్థిరత్వ ప్రణాళికలు వంటి అంశాల్లో భాగస్వామ్యం చూపేందుకు ఆసక్తి వ్యక్తం చేసింది. తెలంగాణ ప్రభుత్వం ప్రతిపాదించిన ప్రాజెక్టులు పట్ల గణనీయమైన స్పందనను అందిస్తూ, వీటి అమలును వేగవంతం చేసేందుకు తమ పూర్ణ సహకారం అందిస్తామని హామీ ఇచ్చారు.

ఇరుపక్షాల మధ్య చర్చలు సానుకూలంగా కొనసాగి, ఉమ్మడి ప్రాజెక్టులను వేగవంతంగా అమలు చేసేందుకు, మరింత సమన్వయంతో పనిచేయడానికి నిర్ణయం తీసుకున్నారు. తెలంగాణలో పెట్టుబడులు పెట్టే అవకాశం ఉన్న వివిధ రంగాలపై సింగపూర్ ప్రభుత్వం లోతుగా పరిశీలించి, వాటిలో భాగస్వామ్యం కోసం తమ శ్రద్ధను పెంచేందుకు సిద్ధమని ప్రకటించింది.

ఈ సమావేశం రాష్ట్రానికి అంతర్జాతీయ స్థాయిలో పెట్టుబడుల ఆకర్షణకై కీలకమయ్యే అవకాశం కల్పించింది.