మధ్యాహ్న భోజనం తిన్న 17 మంది విద్యార్థులకు అస్వస్థత

కరీంనగర్ జిల్లా, నవంబర్ 10: కరీంనగర్ జిల్లా జమ్మికుంట పట్టణంలో ఓ ఆందోళన కలిగించే ఘటన చోటుచేసుకుంది. ప్రభుత్వ ప్రాథమిక బాలికల పాఠశాలలో విద్యనభ్యసిస్తున్న విద్యార్థులు సోమవారం మధ్యాహ్న భోజనం చేసిన తర్వాత అస్వస్థతకు గురయ్యారు. మొత్తం 17 మంది విద్యార్థులు వాంతులు, తలనొప్పి, మలబద్ధకం వంటి లక్షణాలతో బాధపడుతున్నట్లు సమాచారం.

వెంటనే అప్రమత్తమైన ఉపాధ్యాయులు బాధిత విద్యార్థులను సమీపంలోని జమ్మికుంట ప్రభుత్వ ఆసుపత్రికి తరలించారు. అక్కడ వైద్యులు ప్రాథమిక చికిత్స అందించారు. అదృష్టవశాత్తు ఎవరికీ ప్రాణాపాయం లేదని వైద్యులు వెల్లడించారు.

విద్యార్థుల ప్రకారం, మధ్యాహ్న భోజనంలో వడ్డించిన గుడ్లకు దుర్వాసన వస్తోందని, అలాగే అన్నంలో పురుగులు ఉన్నట్లు వారు ఆరోపించారు. ఈ ఘటనతో తల్లిదండ్రులు ఆందోళనకు గురయ్యారు.

ఇదిలా ఉండగా, ఈ ఘటనపై మల్కాజ్గిరి ఎంపీ ఈటల రాజేందర్ స్పందించారు. జమ్మికుంట ఘటన పట్ల తీవ్ర ఆవేదన వ్యక్తం చేస్తూ, విద్యార్థుల పరిస్థితిని అధికారుల ద్వారా తెలుసుకున్నారు. “ప్రభుత్వ పాఠశాలలు, హాస్టళ్లలో భోజన నాణ్యతపై ప్రభుత్వం పూర్తిగా నిర్లక్ష్యం చూపుతోందని, ఇటీవలి ఘటనలు ఆ నిర్లక్ష్యానికి నిదర్శనం” అని ఆయన విమర్శించారు.

పాఠశాల విద్యా శాఖ అధికారులు ఈ ఘటనపై దర్యాప్తు ప్రారంభించారు. ఆహార నమూనాలను సేకరించి ల్యాబ్‌కు పంపించారు. నివేదిక రాగానే తగిన చర్యలు తీసుకుంటామని అధికారులు తెలిపారు. ఈ ఘటన మరల మిడ్డే మిల్‌ భోజన నాణ్యతపై ప్రశ్నలను రేకెత్తిస్తోంది. తల్లిదండ్రులు, విద్యార్థుల భద్రత కోసం ప్రభుత్వం కఠిన చర్యలు తీసుకోవాలని ప్రజలు డిమాండ్ చేస్తున్నారు.