ఆటో ప్రయాణ ఛార్జీల సవరణ.. కొత్త టారిఫ్ వివరాలు ఇవే

 

ఆటో ప్రయాణ ఛార్జీల సవరణ.. కొత్త టారిఫ్ వివరాలు ఇవే

హైదరాబాద్: రాష్ట్రంలో ఆటోరిక్షా ప్రయాణ ఛార్జీలకు సంబంధించి ప్రభుత్వం నూతన నిబంధనలు, రుసుములను సవరించింది. ప్రయాణికులపై భారం, ఆటో డ్రైవర్ల నిర్వహణ వ్యయాలను పరిగణనలోకి తీసుకుని కొత్త టారిఫ్ విధానాన్ని ఖరారు చేసినట్లు అధికారులు తెలిపారు.

కొత్త నిబంధనల ప్రకారం తొలి 1.6 కిలోమీటర్ల ప్రయాణానికి కనీస ఛార్జీ రూ.30గా నిర్ణయించారు. ఆ తర్వాత ప్రతి అదనపు కిలోమీటరుకు రూ.14 చొప్పున వసూలు చేయనున్నారు. ట్రాఫిక్ లేదా ఇతర కారణాలతో ఆటో నిలిచిపోయిన సమయంలో వెయిటింగ్ ఛార్జీ నిమిషానికి 75 పైసలుగా నిర్ణయించారు.

రాత్రి వేళల్లో 1.5 రెట్లు ఛార్జీ

రాత్రి సమయంలో ప్రయాణించే వారికి అదనపు ఛార్జీలు వర్తించనున్నాయి. రాత్రి 11 గంటల నుంచి ఉదయం 5 గంటల వరకు ఆటో ప్రయాణిస్తే సాధారణ టారిఫ్‌పై 1.5 రెట్లు ఛార్జీ చెల్లించాల్సి ఉంటుంది.

లగేజీకి ప్రత్యేక నిబంధనలు

ప్రయాణికులు వెంట తీసుకెళ్లే చిన్నపాటి లగేజీకి అదనపు ఛార్జీ ఉండదు. చిన్న బ్రీఫ్‌కేస్, హ్యాండ్‌బ్యాగ్, అలాగే 60×40 సెంటీమీటర్ల కంటే తక్కువ పరిమాణం ఉన్న అటాచ్డ్ కేసులు లేదా బ్యాగులను ఉచితంగా తీసుకెళ్లవచ్చు.

అయితే నిర్ణయించిన పరిమాణం కంటే పెద్దగా ఉండే ప్రతి ప్యాకేజీకి రూ.0.50 లగేజీ ఛార్జీ చెల్లించాల్సి ఉంటుంది. ఒక ఆటోలో గరిష్టంగా 100 కిలోగ్రాముల వరకు లగేజీకి అనుమతి ఉంటుంది.

డిజిటల్ మీటర్లలో మార్పులు

కొత్త టారిఫ్ అమలుకు అనుగుణంగా ఆటోరిక్షాల్లోని డిజిటల్ మీటర్లను రీసెట్ చేయాలని రవాణా శాఖ స్పష్టం చేసింది. ప్రయాణం ప్రారంభించిన వెంటనే మీటర్‌లో రూ.30 కనీస ఛార్జీ నమోదు కావాలి.

తొలి 1.60 కిలోమీటర్ల ప్రయాణం పూర్తయిన అనంతరం ప్రతి 100 మీటర్లకు రూ.1.40 చొప్పున ఛార్జీ పెరిగేలా డిజిటల్ మీటర్లను సెట్ చేయాల్సి ఉంటుంది.

ప్రయాణికుల నుంచి పారదర్శకంగా ఛార్జీలు వసూలు చేయడంతో పాటు, ఆటో డ్రైవర్లు కొత్త మీటర్ టారిఫ్ నిబంధనలను తప్పనిసరిగా పాటించాలని రవాణా శాఖ సూచించింది.