కొత్తగూడెంలో ద్వంద్వ హత్య కేసు నిందితుడికి జీవిత ఖైదు

కొత్తగూడెం లీగల్: భద్రాద్రి కొత్తగూడెం జిల్లాలో సంచలనం సృష్టించిన ద్వంద్వ హత్య కేసులో నిందితుడికి జీవిత ఖైదు విధిస్తూ కొత్తగూడెం జిల్లా ప్రధాన న్యాయమూర్తి పాటిల్ వసంత్ మంగళవారం తీర్పు వెలువరించారు.

ఘటన వివరాలు

దమ్మపేట మండలం మల్కారం గ్రామానికి చెందిన గుడిమెట్ల పోచమ్మ ఇచ్చిన ఫిర్యాదు ప్రకారం, 2022 జూలై 7వ తేదీ సాయంత్రం ఆమె బావ గుడిమెట్ల నాగేంద్రరావు తన కుటుంబంతో అన్నపురెడ్డి పల్లి గ్రామానికి వెళ్లారు. ఇంటిలో ఎవరూ లేని కారణంగా ఆమె అత్త గుడిమెట్ల సుబ్బలక్ష్మి (50), తన కుమారుడు ఆకాష్ (7) నాగేంద్రరావు ఇంటిలో రాత్రి నిద్రపోయేందుకు వెళ్లారు.

మరుసటి రోజు ఉదయం సుబ్బలక్ష్మి ఫోన్ ఎత్తకపోవడంతో అనుమానం కలిగి కుటుంబ సభ్యులు ఇంటికి వెళ్లి చూడగా, సుబ్బలక్ష్మి మరియు చిన్నారి ఆకాష్ అనుమానాస్పద స్థితిలో మృతిచెందినట్లు గుర్తించారు. సుబ్బలక్ష్మి నోరు, ముక్కు నుంచి రక్తస్రావం కాగా, గడ్డం క్రింద గాయాలు కనిపించాయి. ఆకాష్‌కు కూడా గాయాల గుర్తులు ఉన్నట్లు గుర్తించారు.

పోలీసుల దర్యాప్తు

ఈ ఘటనపై దమ్మపేట పోలీస్ స్టేషన్‌లో కేసు నమోదు చేసి దర్యాప్తు ప్రారంభించారు. అప్పటి ఎస్‌హెచ్‌వో ఎస్సై కె. శ్రావణ్ కుమార్ కేసు నమోదు చేయగా, అప్పటి అశ్వారావుపేట సర్కిల్ ఇన్స్పెక్టర్ బి. బాలకృష్ణ ఆధ్వర్యంలో దర్యాప్తు కొనసాగింది.

దర్యాప్తులో ఈస్ట్ గోదావరి జిల్లా ఉండ్రాజవరం మండలం వలివేణు గ్రామానికి చెందిన మల్లవరపు శ్రీనివాసరావు ఈ హత్యలకు పాల్పడినట్లు పోలీసులు తేల్చారు. అనంతరం కోర్టులో ఛార్జ్‌షీట్ దాఖలు చేశారు.

కోర్టు విచారణ – తీర్పు

కోర్టు మొత్తం 14 మంది సాక్షులను విచారించింది. సమగ్ర విచారణ అనంతరం మల్లవరపు శ్రీనివాసరావుపై నేరం రుజువైందని నిర్ధారించి, జీవిత ఖైదుతో పాటు రూ.1,000 జరిమానా విధించారు. జరిమానా చెల్లించని పక్షంలో అదనంగా ఆరు నెలల సాధారణ కారాగార శిక్ష విధించారు.

ఈ కేసులో అదనపు పబ్లిక్ ప్రాసిక్యూటర్ పి.వి.డి. లక్ష్మి వాదనలు వినిపించారు. కోర్టు నోడల్ ఆఫీసర్ డి. రాఘవయ్య, కోర్టు లైజాన్ ఆఫీసర్ ఎన్. వీరబాబు, కోర్టు డ్యూటీ ఆఫీసర్ పీసీ సి.హెచ్. శ్రీను తదితరులు సహకరించారు. ఈ తీర్పుతో బాధిత కుటుంబానికి కొంత మేర న్యాయం జరిగిందని స్థానికులు అభిప్రాయపడుతున్నారు.