స్టార్ హోటల్‌లో దారుణం.. ఇద్దరు కూతుళ్లను చంపి, తండ్రి ఆత్మహత్యాయత్నం

బెంగళూరు: కుటుంబ కలహాలు, అనుమానాలు చివరకు ఇద్దరు చిన్నారుల ప్రాణాలను బలిగొన్న విషాద ఘటన బెంగళూరులో వెలుగుచూసింది. భార్యకు వివాహేతర సంబంధం ఉందనే అనుమానంతో ఓ వ్యక్తి తన ఇద్దరు కుమార్తెలను గొంతు నులిమి హత్య చేసినట్లు పోలీసులు ప్రాథమికంగా నిర్ధారించారు. అనంతరం తాను కూడా ఆత్మహత్యకు ప్రయత్నించాడు. కెంపెగౌడ అంతర్జాతీయ విమానాశ్రయం సమీపంలోని ఓ ఫైవ్‌స్టార్ హోటల్‌లో ఈ దారుణ ఘటన చోటుచేసుకుంది.

హోటల్‌లో గదిని బుక్ చేసిన తండ్రి

పోలీసుల వివరాల ప్రకారం.. బెంగళూరులోని నాగవార ప్రాంతానికి చెందిన 40 ఏళ్ల ఇమ్రాన్‌ తన ఇద్దరు కుమార్తెలతో కలిసి హోటల్‌లో గది బుక్ చేసుకున్నాడు. ఒక చిన్నారి వయసు 10 సంవత్సరాలు కాగా, మరో చిన్నారి వయసు 5 సంవత్సరాలు. ముందు రోజు సాయంత్రం ముగ్గురూ హోటల్‌లోకి వెళ్లినట్లు పోలీసులు తెలిపారు.

అయితే సోమవారం సాయంత్రం హోటల్ గదిలో నుంచి అరుపులు, అనుమానాస్పద శబ్దాలు వినిపించడంతో సిబ్బంది అప్రమత్తమయ్యారు. వెంటనే గదిని పరిశీలించగా ఇద్దరు చిన్నారులు మంచంపై విగతజీవులుగా కనిపించారు. అదే గదిలో ఇమ్రాన్ తీవ్రంగా గాయపడి కనిపించాడు.

పిల్లలను చంపి.. తన గొంతు కోసుకున్న తండ్రి

పోలీసుల ప్రాథమిక దర్యాప్తు ప్రకారం.. ఇమ్రాన్ తన ఇద్దరు కుమార్తెలను గొంతు నులిమి హత్య చేసినట్లు తెలుస్తోంది. అనంతరం కత్తితో తన గొంతు కోసుకుని ఆత్మహత్యకు ప్రయత్నించాడు. హోటల్ సిబ్బంది వెంటనే పోలీసులకు సమాచారం అందించడంతో పోలీసులు ఘటనా స్థలానికి చేరుకున్నారు.

తీవ్రంగా గాయపడిన ఇమ్రాన్‌ను వెంటనే ఆసుపత్రికి తరలించారు. సకాలంలో చికిత్స అందడంతో అతడు ప్రాణాలతో బయటపడ్డాడు.

భార్యపై అనుమానమే కారణమా?

ఈ ఘటనకు కుటుంబ కలహాలు, భార్యపై ఇమ్రాన్‌కు ఉన్న అనుమానాలే కారణంగా పోలీసులు భావిస్తున్నారు. తన భార్యకు వివాహేతర సంబంధం ఉందని ఇమ్రాన్‌ అనుమానించినట్లు బెంగళూరు నార్త్ ఈస్ట్ డీసీపీ వెల్లడించారు.

తన కుమార్తెలు ఇలాంటి తల్లితో కలిసి ఉండకూడదని భావించిన ఇమ్రాన్.. వారిని చంపి, తాను కూడా ప్రాణాలు తీసుకోవాలని నిర్ణయించుకున్నట్లు ప్రాథమిక విచారణలో వెల్లడైనట్లు పోలీసులు తెలిపారు.

గదిలో లభించిన లేఖ

హోటల్ గదిలో పోలీసులు ఓ నోట్‌ను స్వాధీనం చేసుకున్నారు. అందులో ఇమ్రాన్ తన భార్యపై తీవ్ర ఆరోపణలు చేసినట్లు తెలుస్తోంది. ఈ లేఖ ఆధారంగా కూడా పోలీసులు దర్యాప్తు చేస్తున్నారు.

ఇద్దరు చిన్నారుల మృతదేహాలను పోస్టుమార్టం నిమిత్తం తరలించిన పోలీసులు.. ఘటనకు సంబంధించిన పూర్తి వివరాలను సేకరిస్తున్నారు. ఇమ్రాన్‌పై హత్య కేసు నమోదు చేసి దర్యాప్తు కొనసాగిస్తున్నారు. భార్యపై చేసిన ఆరోపణలు నిజమా? లేక కేవలం అనుమానాల ఆధారంగానే ఈ దారుణానికి పాల్పడ్డాడా? అనే కోణంలోనూ పోలీసులు విచారణ చేపట్టారు.