థాయ్‌లాండ్ భామ ఓపల్ సుచాత చువాంగ్ శ్రీకి మిస్ వరల్డ్ కిరీటం

హైదరాబాద్, ప్రపంచం మొత్తం ఎదురుచూస్తున్న అందాల పోటీ మిస్ వరల్డ్ 2025 హైదరాబాద్‌ నగరానికి గొప్ప గౌరవాన్ని తీసుకొచ్చింది. హైటెక్స్ వేదికగా జరిగిన ఈ ప్రతిష్టాత్మక అంతర్జాతీయ పోటీలో థాయ్‌లాండ్‌కు చెందిన ఓపల్ సుచాత చువాంగ్ శ్రీ అద్భుత ప్రదర్శనతో విజేతగా నిలిచింది. ఈ విజయం ఆమెకు కేవలం అందాల కిరీటాన్ని మాత్రమే కాదు, ప్రపంచ మిచ్చిలో తనకంటూ ఓ ప్రత్యేక స్థానం కల్పించింది.

మిస్ వరల్డ్ మొదటి రన్నరప్‌గా మిస్ ఇథియోపియా ఎంపికవగా, రెండో రన్నరప్‌గా మిస్ పోలాండ్ నిలిచింది. భారతదేశం తరఫున పోటీలో పాల్గొన్న నందిని గుప్తాకు ఈసారి అదృష్టం సహకరించలేదు. ఆమె టాప్ 8లో స్థానం పొందలేక పోటీలో నిష్క్రమించింది. భారత అభిమానులకు ఇది నిరాశ కలిగించినా, ఆసియా ఖండానికి చెందిన మిగిలిన రెండు దేశాలైన థాయ్‌లాండ్, ఫిలిప్పీన్స్ పోటీలో మెరిశాయి.

ఈ ఏడాది మిస్ వరల్డ్ పోటీల్లో మొత్తం ఎనిమిది దేశాల సుందరీమణులు టాప్ 8లో చోటు దక్కించుకున్నారు. వాటిలో మార్టినిక్, బ్రెజిల్, ఇథియోపియా, నమీబియా, పోలాండ్, ఉక్రెయిన్, ఫిలిప్పీన్స్, థాయ్‌లాండ్ దేశాల ప్రాతినిధ్యం ఉంది. ఆసియా ఖండం తరఫున థాయ్‌లాండ్ మరియు ఫిలిప్పీన్స్ నుంచి పోటీదారులు టాప్ 8లోకి ఎంపికవడం విశేషంగా నిలిచింది.

టాప్ 8 నుంచి నాలుగు మంది అందాల భామలను టాప్ 4గా ఎంపిక చేసిన అనంతరం, జ్యూరీ ఓపల్ సుచాత చువాంగ్ శ్రీను విజేతగా ప్రకటించింది. ఆమె ప్రతిభ, సమాజంపై అవగాహన, తనలోని నాయకత్వ గుణాలు, ప్రశ్నలకు ఇచ్చిన సమాధానాలు కోటి ప్రేక్షకులను ఆకట్టుకున్నాయి.

ఈ వేదికపై తెలంగాణ ముఖ్యమంత్రి రేవంత్ రెడ్డి, మెగాస్టార్ చిరంజీవి, సినీ నటుడు నాగార్జున, నటి ఖుష్బూ వంటి ప్రముఖులు పాల్గొనగా, వేడుక అత్యంత వైభవంగా సాగింది. విజేతకు రూ. 8.5 కోట్ల నగదు బహుమతితో పాటు, విలువైన 1,770 వజ్రాలతో తయారు చేసిన కిరీటం, అంతర్జాతీయ స్థాయిలో ఏడాది పాటు ఉచిత ప్రపంచ యాత్ర చేసే అవకాశం లభించింది.

ఇవి కేవలం బహుమతులు మాత్రమే కాక, విజేతకు సామాజిక సేవా కార్యక్రమాల్లో భాగస్వామ్యం కావడానికీ, గ్లోబల్ యూత్ ఐకాన్‌గా కొనసాగేందుకు వేదికగా నిలవనున్నాయి. మిస్ వరల్డ్ 2025 విజేతగా ఓపల్ చువాంగ్ శ్రీ ఎంపిక కావడం, థాయ్‌లాండ్‌కు గర్వకారణమే కాదు, మహిళా సాధికారతకు ప్రతీకగా నిలిచింది.