జనసేనకు భద్రాద్రి కొత్తగూడెంలో షాక్.. జిల్లా కోఆర్డినేటర్ వేముల కార్తీక్ రాజీనామా
భద్రాద్రి కొత్తగూడెం: భద్రాద్రి కొత్తగూడెం జిల్లాలో జనసేన పార్టీకి ఊహించని ఎదురుదెబ్బ తగిలింది. పార్టీ జిల్లా కోఆర్డినేటర్, కొత్తగూడెం నియోజకవర్గ ఇన్చార్జ్ వేముల కార్తీక్ తన పార్టీ సభ్యత్వానికి రాజీనామా చేస్తున్నట్లు ప్రకటించారు. శనివారం ఆయన సోషల్ మీడియా వేదికగా వీడియో విడుదల చేసి తన నిర్ణయాన్ని వెల్లడించారు.
వీడియోలో మాట్లాడుతూ, పార్టీలో ఇటీవల చోటుచేసుకుంటున్న పరిణామాల నేపథ్యంలో తీవ్ర మనస్తాపానికి గురైనట్లు తెలిపారు. చాలా ఆలోచించిన తర్వాతే ఈ నిర్ణయం తీసుకున్నానని పేర్కొన్నారు.
పార్టీలో కొత్త పరిణామాలపై అసంతృప్తి
ఇటీవల కొత్తగూడెంకు చెందిన మాజీ హెల్త్ డైరెక్టర్ గడల శ్రీనివాస్ జనసేన పార్టీలో చేరడం జిల్లాలో చర్చనీయాంశంగా మారింది. అయితే 2016 నుంచి పార్టీ కోసం పనిచేస్తున్న పవన్ కళ్యాణ్ అభిమానులు, పార్టీ కార్యకర్తలు, స్థానిక నాయకులకు కనీస సమాచారం ఇవ్వకుండా ఈ పరిణామాలు జరిగాయని కార్తీక్ అసంతృప్తి వ్యక్తం చేసినట్లు సమాచారం.
అంతేకాకుండా, పార్టీ కోసం ఎన్నేళ్లుగా కష్టపడుతున్న కార్యకర్తలను పక్కనబెట్టి ఆర్థికంగా బలమైన వ్యక్తులకు ప్రాధాన్యత ఇస్తున్నారనే భావనతోనే రాజీనామా చేసినట్లు పార్టీ వర్గాల్లో చర్చ జరుగుతోంది.
నాయకుల సమ్మేళనం ముందు రాజీనామా
ఆదివారం కొత్తగూడెంలో మాజీ హెల్త్ డైరెక్టర్ గడల శ్రీనివాస్ ఆధ్వర్యంలో జనసేన నాయకుల సమ్మేళనం నిర్వహించనున్న నేపథ్యంలో, అంతకు ముందే జిల్లా కోఆర్డినేటర్ వేముల కార్తీక్ రాజీనామా చేయడం రాజకీయంగా ప్రాధాన్యత సంతరించుకుంది.
జిల్లాలో చర్చనీయాంశం
భద్రాద్రి కొత్తగూడెం జిల్లాలో ఇప్పటికే పరిమిత స్థాయిలో ఉన్న జనసేన పార్టీకి ఈ రాజీనామా మరింత ఇబ్బందికర పరిస్థితిని తీసుకురావచ్చని రాజకీయ విశ్లేషకులు అభిప్రాయపడుతున్నారు. మరోవైపు కార్తీక్ రాజీనామాపై జనసేన జిల్లా నాయకత్వం లేదా రాష్ట్ర నాయకత్వం నుంచి ఇప్పటివరకు అధికారిక స్పందన వెలువడలేదు. ఆయన భవిష్యత్ రాజకీయ ప్రస్థానం ఎలా ఉండబోతుందనే అంశంపై కూడా ఆసక్తి నెలకొంది.
Post a Comment