మహిళా ఎస్సైపై కాంగ్రెస్ నాయకుడి దాడి — కల్లూరులో ఉద్రిక్తత

ఖమ్మం జిల్లా కల్లూరు పట్టణం శుక్రవారం అర్ధరాత్రి ఒక్కసారిగా ఉద్రిక్తతకు లోనైంది. తల్లాడ మండలానికి చెందిన కాంగ్రెస్ నాయకుడు రాయల రాము అనే వ్యక్తి మద్యం మత్తులో హోటల్ సిబ్బందితో వివాదానికి దిగడంతో, పరిస్థితి హతాశాత్మకంగా మారింది. ఈ ఘటనలో విధి నిర్వహణలో ఉన్న మహిళా ఎస్‌ఐ హరితపై రాము దాడికి పాల్పడినట్టు సమాచారం. ఈ ఘటన ఇప్పుడు స్థానికంగా పెద్ద చర్చనీయాంశంగా మారింది.

వివరాల్లోకి వెళితే:

రాయల రాము తన అనుచరులతో కలిసి కల్లూరు ఎన్‌ఎస్‌పీ సెంటర్లోని చౌదరి హోటల్‌కి వచ్చి భోజనం కోసం ఆర్డర్ ఇచ్చాడు. అయితే ఆయన కోరిన పదార్థాలు లేవని హోటల్ సిబ్బంది చెప్పడంతో, రాము మండిపడి వాగ్వాదానికి దిగాడు. కొద్దిసేపటిలోనే గొడవ తీవ్రరూపం దాల్చి, ఇరుపక్షాలు పరస్పరం దాడులకు పాల్పడ్డారు. ఈ దృశ్యాలు హోటల్ ఆవరణలో ఉండే సీసీ కెమెరాల్లో కూడా రికార్డు అయినట్లు సమాచారం.

హోటల్ నిర్వాహకుడి ఫిర్యాదు మేరకు కల్లూరు పోలీస్ స్టేషన్ నుండి మహిళా ఎస్సై హరిత సిబ్బందితో ఘటనా స్థలానికి చేరుకొని పరిస్థితిని అదుపులోకి తీసుకొచ్చే ప్రయత్నం చేశారు. ఈ క్రమంలో రాము మహిళా ఎస్సైతో వాగ్వాదానికి దిగాడు. అతని దురుసు ప్రవర్తనను చూసిన ఎస్‌ఐ హరిత రామును చెంపపై కొట్టినట్టు స్థానికులు చెబుతున్నారు. దీనికి ప్రతిగా రాము కూడా ఎస్సైపై దాడికి పాల్పడ్డాడు.

ఉద్రిక్తత, అరెస్టులు, దర్యాప్తు

ఘటనతో స్థానికంగా తీవ్ర ఉద్రిక్తత ఏర్పడింది. పోలీసుల హస్తక్షేపంతో పరిస్థితి అదుపులోకి వచ్చింది. తర్వాత రాయల రాము సహా అతని అనుచరులు మొత్తం ఆరుగురిని పోలీసులు అదుపులోకి తీసుకున్నారు. వీరిని వీఎం బంజర్ పోలీస్ స్టేషన్‌కు తరలించి, చికిత్స అందించినట్లు తెలుస్తోంది.

కేసు నమోదు

ఈ ఘటనపై పోలీసులు అధికారికంగా కేసు నమోదు చేశారు. ప్రస్తుతం పూర్తి స్థాయిలో దర్యాప్తు కొనసాగిస్తున్నామని, హోటల్ సిబ్బంది, ప్రత్యక్ష సాక్షుల వాఖ్యాలు నమోదు చేస్తున్నామని వెల్లడించారు.

సామాజిక మాధ్యమాల్లో హల్‌చల్

ఈ ఘటనకు సంబంధించిన వీడియోలు సామాజిక మాధ్యమాల్లో వైరల్ అవుతూ, అధికారవర్గాల దృష్టిని ఆకర్షిస్తున్నాయి. మహిళా పోలీసులపై దాడిని తీవ్రంగా ఖండిస్తూ నెటిజన్లు ఆగ్రహం వ్యక్తం చేస్తున్నారు. ఇకపోతే కాంగ్రెస్ నాయకుడిపై కఠిన చర్యలు తీసుకోవాలనే డిమాండ్లు వినిపిస్తున్నాయి.