బైక్ ను లారీ ఢీకొని మందమర్రి ఎంపీవో మృతి

మంచిర్యాల, ఫిబ్రవరి 28, 2026: మంచిర్యాల జిల్లా కేంద్రంలో శనివారం జరిగిన రోడ్డు ప్రమాదం తీవ్ర విషాదాన్ని మిగిల్చింది. జిల్లాలోని ఐబీ చౌరస్తా హనుమాన్ విగ్రహం సమీపంలో జరిగిన ఈ ప్రమాదంలో మందమర్రి మండల ఎంపీవో ములకల సత్యనారాయణ ప్రాణాలు కోల్పోయారు.

స్థానికులు తెలిపిన వివరాల ప్రకారం, సత్యనారాయణ బైక్‌పై ప్రయాణిస్తూ ఐబీ చౌరస్తా వద్దకు చేరుకున్న సమయంలో టర్నింగ్ వద్ద వేగంగా వచ్చిన లారీ ఆయన వాహనాన్ని ఢీకొట్టింది. ప్రమాదం తీవ్రంగా ఉండటంతో సత్యనారాయణకు తీవ్ర గాయాలు అయ్యాయి.

అక్కడే ఉన్న స్థానికులు వెంటనే స్పందించి ఆయనను సమీప ఆసుపత్రికి తరలించారు. అయితే చికిత్స పొందుతూ ఆయన మృతిచెందినట్లు వైద్యులు నిర్ధారించారు.

ఈ ఘటనతో మండలంలో విషాద వాతావరణం నెలకొంది. సమాచారం అందుకున్న పోలీసులు సంఘటనా స్థలానికి చేరుకుని కేసు నమోదు చేసి దర్యాప్తు చేపట్టారు. లారీ డ్రైవర్‌పై చర్యలు తీసుకునేందుకు చర్యలు కొనసాగుతున్నట్లు తెలిపారు.