5 వేల పోలీసు ఉద్యోగాల భర్తీ?.. నిరుద్యోగులకు గుడ్ న్యూస్

హైదరాబాద్, మే 30: తెలంగాణలో పోలీసు ఉద్యోగాల కోసం ఎదురుచూస్తున్న నిరుద్యోగ యువతకు త్వరలో శుభవార్త అందే అవకాశం కనిపిస్తోంది. రాష్ట్ర పోలీసు శాఖను మరింత బలోపేతం చేసే లక్ష్యంతో తొలి దశలో సుమారు 5 వేల పోలీసు పోస్టుల భర్తీకి ప్రభుత్వం సన్నాహాలు చేస్తున్నట్లు సమాచారం.

తెలంగాణ పోలీసు శాఖలో ప్రస్తుతం 19 వేలకుపైగా ఖాళీలు ఉన్నట్లు తెలుస్తోంది. ఈ ఖాళీలను ఒకేసారి భర్తీ చేయడం కంటే, దశలవారీగా నియామకాలు చేపట్టాలని ప్రభుత్వం భావిస్తున్నట్లు సమాచారం. ఈ నేపథ్యంలో తొలి విడతగా 5 వేల పోస్టుల భర్తీకి సంబంధించిన ప్రతిపాదనలు పోలీసు శాఖ నుంచి ఆర్థిక శాఖకు పంపినట్లు తెలుస్తోంది.

ఆర్థిక శాఖ నుంచి అనుమతులు లభించిన వెంటనే నియామక ప్రక్రియకు సంబంధించిన నోటిఫికేషన్ విడుదలయ్యే అవకాశాలు ఉన్నాయని అధికార వర్గాలు చెబుతున్నాయి. మిగిలిన సుమారు 14 వేల ఖాళీల భర్తీపై కూడా ప్రభుత్వం సానుకూలంగా ఉన్నట్లు సమాచారం.

పెరుగుతున్న ఖాళీలు.. అధికమవుతున్న పనిభారం

పోలీసు శాఖలో ప్రతి ఏడాది వివిధ హోదాల్లో సుమారు 2 వేల మందికి పైగా సిబ్బంది పదవీ విరమణ చేస్తున్నారు. దీంతో అనేక విభాగాల్లో సిబ్బంది కొరత ఏర్పడి, విధుల్లో ఉన్న పోలీసులపై పనిభారం పెరుగుతోంది. ఈ పరిస్థితిని దృష్టిలో ఉంచుకుని ఖాళీల భర్తీ ప్రక్రియను వేగవంతం చేయాలని ప్రభుత్వం నిర్ణయించినట్లు తెలుస్తోంది.

సైబర్ నేరాలు, డ్రగ్స్ నియంత్రణపై ప్రత్యేక దృష్టి

ఈసారి చేపట్టబోయే నియామకాల్లో ఎంపికైన సిబ్బందిలో గణనీయమైన సంఖ్యలో పోలీసులను సైబర్ క్రైమ్, మాదకద్రవ్యాల నియంత్రణ, ఆధునిక నేరాల దర్యాప్తు విభాగాల్లో నియమించాలనే ఆలోచనలో ప్రభుత్వం ఉన్నట్లు సమాచారం. దేశవ్యాప్తంగా పెరుగుతున్న సైబర్ నేరాలు, డ్రగ్స్ మాఫియాను సమర్థంగా ఎదుర్కొనేందుకు ప్రత్యేక బలగాలను మరింత బలోపేతం చేయాలని ప్రభుత్వం భావిస్తోంది.

అధికారిక ప్రకటన కోసం ఎదురుచూపు

అయితే, 5 వేల పోస్టుల భర్తీపై ఇప్పటివరకు అధికారిక నోటిఫికేషన్ విడుదల కాలేదు. ఆర్థిక శాఖ అనుమతులు, ప్రభుత్వ ఆమోదం అనంతరం పూర్తి వివరాలతో నోటిఫికేషన్ విడుదలయ్యే అవకాశం ఉంది. దీంతో పోలీసు ఉద్యోగాల కోసం సిద్ధమవుతున్న అభ్యర్థులు అధికారిక ప్రకటన కోసం ఆసక్తిగా ఎదురుచూస్తున్నారు.