భీమారంలో విషాదం.. విద్యుత్ షాక్తో నవవరుడు, తండ్రి మృతి
హనుమకొండ జిల్లా భీమారంలో విషాదం.. విద్యుత్ షాక్తో నవవరుడు, తండ్రి మృతి
హనుమకొండ, జూలై 1: హనుమకొండ జిల్లా భీమారం ప్రాంతంలో తీవ్ర విషాదం చోటుచేసుకుంది. ఇంటి అలంకరణ కోసం ఏర్పాటు చేసిన విద్యుత్ లైటింగ్ను పరిశీలిస్తుండగా జరిగిన ప్రమాదంలో నవవరుడు శరత్ (32), ఆయన తండ్రి సాంబయ్య (62) విద్యుదాఘాతానికి గురై మృతిచెందారు.
సమాచారం ప్రకారం, ఇంటి వద్ద ఏర్పాటు చేసిన అలంకరణ లైటింగ్లో లోపం ఉందేమోనని సాంబయ్య పరిశీలిస్తుండగా ప్రమాదవశాత్తు విద్యుత్ వైర్లను తాకడంతో ఆయనకు తీవ్ర విద్యుత్ షాక్ తగిలింది. తండ్రి ప్రమాదంలో చిక్కుకున్న విషయం గమనించిన కుమారుడు శరత్ వెంటనే ఆయనను రక్షించేందుకు ప్రయత్నించాడు. అయితే ఆ ప్రయత్నంలో శరత్ కూడా విద్యుదాఘాతానికి గురై అక్కడికక్కడే ప్రాణాలు కోల్పోయాడు.
ఇటీవలే, జూన్ 24న శరత్ వివాహం ఘనంగా జరిగింది. హైదరాబాద్లో చార్టర్డ్ అకౌంటెంట్గా పనిచేస్తున్న శరత్ పెళ్లి వేడుకలు ముగిసి వారం రోజులు కూడా కాకముందే ఈ విషాద ఘటన చోటుచేసుకోవడంతో కుటుంబ సభ్యులు, బంధువులు తీవ్ర శోకసంద్రంలో మునిగిపోయారు.
ఒకే కుటుంబానికి చెందిన తండ్రి, కుమారుడు ఒకేసారి మృతి చెందడం స్థానికంగా తీవ్ర కలకలం రేపింది. సమాచారం అందుకున్న పోలీసులు ఘటనాస్థలికి చేరుకుని మృతదేహాలను స్వాధీనం చేసుకుని పోస్టుమార్టం నిమిత్తం ఆస్పత్రికి తరలించారు. ఘటనపై కేసు నమోదు చేసి దర్యాప్తు చేపట్టారు.
నవదంపతుల జీవితంలో ఆనందం వెల్లివిరియాల్సిన సమయంలో ఈ ఘోర విషాదం చోటుచేసుకోవడంతో భీమారం ప్రాంతంలో విషాద ఛాయలు అలుముకున్నాయి.
Post a Comment