నిజామాబాద్ లో దారుణం.. ప్రియుడితో కలిసి భర్తకు ఉరివేసి హత్య చేసిన భార్య

 

నిజామాబాద్ లో దారుణం.. ప్రియుడితో కలిసి భర్తకు ఉరివేసి హత్య చేసిన భార్య

నిజామాబాద్, జూలై 1: రాష్ట్రంలో మరో దారుణ ఘటన వెలుగుచూసింది. భార్య తన ప్రియుడితో కలిసి భర్తను ఉరివేసి హత్య చేసిన ఘటన నిజామాబాద్ జిల్లా ఎడపల్లి మండలం అంబం గ్రామంలో చోటుచేసుకుంది. ఈ ఘటన స్థానికంగా తీవ్ర కలకలం రేపింది.

పోలీసుల ప్రాథమిక సమాచారం ప్రకారం, భార్యకు ఉన్న అక్రమ సంబంధం కారణంగానే ఈ హత్య జరిగినట్లు అనుమానిస్తున్నారు. భర్తను హత్య చేసిన అనంతరం గుండెపోటుతో మరణించినట్లు నమ్మించే ప్రయత్నం చేసినట్లు తెలుస్తోంది. అయితే మృతుడి మెడపై గాయాల ఆనవాళ్లు గమనించిన గ్రామస్థులు అనుమానం వ్యక్తం చేసి పోలీసులకు సమాచారం అందించారు.

ఘటనాస్థలికి చేరుకున్న పోలీసులు మృతదేహాన్ని పరిశీలించి, కేసు నమోదు చేశారు. అనంతరం మృతుడి భార్యతో పాటు ఆమె ప్రియుడిని అదుపులోకి తీసుకుని విచారణ చేపట్టారు. పోస్టుమార్టం నివేదికతో పాటు విచారణలో లభించే ఆధారాల ఆధారంగా తదుపరి చర్యలు తీసుకోనున్నట్లు పోలీసులు తెలిపారు.

ఇటీవలి కాలంలో అక్రమ సంబంధాల నేపథ్యంలో భార్యలు భర్తలను హత్య చేస్తున్న ఘటనలు రాష్ట్రంతో పాటు దేశవ్యాప్తంగా పెరుగుతుండటం ఆందోళన కలిగిస్తోంది. తమ సంబంధానికి భర్త అడ్డుగా ఉన్నాడనే కారణంతో ఇలాంటి దారుణాలకు పాల్పడుతున్న ఘటనలు వరుసగా వెలుగులోకి వస్తున్నాయి.

ఈ ఘటనకు సంబంధించిన పూర్తి వివరాలు పోలీసుల విచారణ అనంతరం వెల్లడికానున్నాయి.