ఇన్‌స్టాగ్రామ్ పరిచయం బాలికపై లైంగిక దాడి

ఆదిలాబాద్ పట్టణంలో ఇన్‌స్టాగ్రామ్ పరిచయం ద్వారా ఒక బాలికపై లైంగిక దాడి జరిగిన ఘటన వెలుగులోకి వచ్చింది. ఆదిలాబాద్ రిమ్స్‌లో చదువుతున్న 17 ఏళ్ల బాలికకు రంగారెడ్డి జిల్లా శంషాబాద్ మండలం పాలమాకులకి చెందిన 22 ఏళ్ల శివ అనే యువకుడు ఇన్‌స్టాగ్రామ్ ద్వారా పరిచయమయ్యాడు.

పెండ్లి చేసుకుంటానని నమ్మకంగా మాటలు చెప్పి, యువకుడు ఆమెను ప్రలోభపెట్టి ఈ నెల 9న సికింద్రాబాద్‌లో కలుసుకున్నాడు. ఆ తర్వాత ఆ బాలికను మోసం చేసి లైంగిక దాడి జరిపాడు.

బాలిక కళాశాలకు వెళ్లకపోవడంతో ఆమె కుటుంబ సభ్యులు ఈ నెల 10న పోలీసులకు ఫిర్యాదు చేశారు. అదృశ్యం కేసు నమోదు చేసిన పోలీసులు దర్యాప్తు చేసి బాలిక ఆచూకీ కనుగొన్నారు. అనంతరం ఆమెను ఆదిలాబాద్‌కు రప్పించి వాంగ్మూలం నమోదు చేశారు.

బాధితురాలిని చికిత్స నిమిత్తం రిమ్స్‌కు తరలించారు. నిందితుడిపై పోక్సో చట్టం కింద కేసు నమోదు చేశారు. సీఐ కరుణాకర్ రావు ప్రకారం, నిందితుడిని బుధవారం కోర్టులో హాజరుపరచి, తర్వాత జిల్లా జైలుకు తరలించారు.