ప్రతి స్కూల్ బస్సుకు ఫిట్నెస్ తప్పనిసరి: జిల్లా రవాణా అధికారి వెంకటరమణ

భద్రాద్రి కొత్తగూడెం జిల్లా రవాణా అధికారి వెంకటరమణ మంగళవారం నాడు స్కూల్ బస్సుల డ్రైవర్లకు అవగాహన కల్పిస్తూ కీలక వ్యాఖ్యలు చేశారు. జిల్లా రవాణా కార్యాలయంలో ఏర్పాటు చేసిన సమావేశంలో ఆయన మాట్లాడుతూ, విద్యార్థుల ప్రాణ భద్రత దృష్టిలో ఉంచుకుని ప్రతి స్కూల్ బస్సుకు ఫిట్నెస్ సర్టిఫికెట్ తప్పనిసరి అని అన్నారు.

బస్సు నడిపే ప్రతి డ్రైవర్ వాహనాన్ని ప్రారంభించక ముందు ఫిట్నెస్ పరీక్షించుకోవాలన్నారు. పిల్లలను రవాణా చేసే బస్సులలో తప్పనిసరిగా ఒక అటెండెంట్ ఉండాల్సిందిగా ఆయన పేర్కొన్నారు. డ్రైవర్లు ప్రతి నెల తాము వైద్య పరీక్షలు చేయించుకోవాలని సూచించారు. మద్యం సేవించి వాహనాలు నడపరాదని, కఠిన చట్ట ప్రకారమే చర్యలు తీసుకుంటామని హెచ్చరించారు.

స్కూల్ యాజమాన్యాలు మరియు బస్సు డ్రైవర్లు తమ బాధ్యతను నిబద్ధతతో నిర్వర్తించాలని వెంకటరమణ సూచించారు. ఈ సందర్భంగా స్కూల్ బస్సుల భద్రతా ప్రమాణాలు, పాటించవలసిన నిబంధనలపై కరపత్రాలు విడుదల చేశారు. రహదారి భద్రతను మెరుగుపరచడంలో అందరూ భాగస్వాములవ్వాలని ఆయన పేర్కొన్నారు.

ఈ కార్యక్రమంలో పలువురు బస్సు డ్రైవర్లు, స్కూల్ ప్రతినిధులు పాల్గొన్నారు.