తూప్రాన్‌లో గంజాయి విక్రయిస్తున్న వ్యక్తి అరెస్ట్: మెదక్ ఎక్సైజ్ శాఖ దాడులు
మెదక్ జిల్లా తూప్రాన్ పట్టణంలో గంజాయి విక్రయాలు చేస్తున్న ఒక వ్యక్తిని ఎక్సైజ్ శాఖ అధికారులు అరెస్ట్ చేశారు. మెదక్ జిల్లా ప్రొహిబిషన్ అండ్ ఎక్సైజ్ అధికారి డిపిఓ జి. శ్రీనివాస్ రెడ్డి ఆదేశాల మేరకు జిల్లా టాస్క్ ఫోర్స్ (డీటిఎఫ్) సీఐ గోపాల్ సారథ్యంలో సిబ్బంది ఈ దాడులను నిర్వహించారు.
విశ్వసనీయ సమాచారంతో అధికారులు తూప్రాన్ పట్టణంలో నర్సాపూర్ చౌరస్తా వద్ద వాహనాలను తనిఖీ చేస్తుండగా, అనుమానాస్పదంగా కనిపించిన ఒక ద్విచక్రవాహనాన్ని ఆపి తనిఖీ చేశారు. ఆ వాహనంలో 41 ప్యాకెట్లు (మొత్తం 300 గ్రాముల) ఎండు గంజాయి లభ్యమయ్యాయి. దీంతో వాహనాన్ని మరియు ఆ వ్యక్తిని అదుపులోకి తీసుకున్నారు.
తదుపరి విచారణలో అతని పేరు బుర్ర. జితేందర్ అని గుర్తించబడింది. అతడు తూప్రాన్ పట్టణంలోని హైదరగూడకు చెందినవాడని తెలిపాడు. అధిక లాభాల ఆశతో గంజాయి విక్రయాలకు పాల్పడుతున్నట్లు జితేందర్ వెల్లడించాడు. అధికారులు అతని పై ఎన్.డి.పి.ఎస్. చట్టం ప్రకారం కేసు నమోదు చేయనున్నట్టు వెల్లడించారు. తదుపరి విచారణ కోసం నర్సాపూర్ పోలీస్ స్టేషన్‌కు అప్పగించారని తెలిపారు.
ఈ సందర్భంగా టాస్క్ ఫోర్స్ సీఐ గోపాల్ మాట్లాడుతూ, “గంజాయి విక్రయాలు, రవాణా చేసే వారి సమాచారం ప్రజలు ఎక్సైజ్ అధికారులకు అందించాలి. అందించిన సమాచారం గోప్యంగా ఉంచి, చట్టపరమైన చర్యలు తీసుకుంటాం,” అని చెప్పారు.
ఈ దాడిలో ఎస్సై బాలయ్య, హెడ్ కానిస్టేబుల్స్ మరియు కానిస్టేబుల్స్ ఎల్లయ్య, చంద్రయ్య, రాజు, రవి, నవీన్, నరేష్, హరీష్ తదితరులు పాల్గొన్నారు.
పలుకుబడి కలిగిన ప్రదేశాల్లో ఇటువంటి దాడులు కొనసాగుతాయని అధికారులు తెలిపారు.
Post a Comment