తెలంగాణ ప్రభుత్వ పాఠశాలల్లో విద్యా ప్రమాణాల పెంపే లక్ష్యం: సీఎం రేవంత్‌రెడ్డి

హైదరాబాద్, ప్రభుత్వ పాఠశాలల్లో విద్యా ప్రమాణాలను అభివృద్ధి చేయడం తమ ప్రభుత్వ ప్రధాన లక్ష్యమని తెలంగాణ ముఖ్యమంత్రి రేవంత్ రెడ్డి తెలిపారు. నాణ్యమైన విద్యను ప్రతి విద్యార్థికి అందించడంలో ఏ ఖర్చుకు వెనకాడబోమని స్పష్టం చేశారు. పాఠశాలలు తిరిగి ప్రారంభమైన నేపథ్యంలో రాష్ట్ర కమాండ్ కంట్రోల్ సెంటర్‌ (ICCC) లో విద్యాశాఖ ఉన్నతాధికారులతో సమీక్ష సమావేశం నిర్వహించిన ముఖ్యమంత్రి, విద్యా వ్యవస్థను సమూలంగా అభివృద్ధి చేయాల్సిన అంశాలపై సూచనలు చేశారు.

📚 కొత్తగా 571 పాఠశాలల ఏర్పాటు

రాష్ట్రంలో 20 మందికిపైగా విద్యార్థులు ఉన్న గ్రామీణ, పట్టణ ప్రాంతాల్లో కొత్తగా 571 ప్రభుత్వ పాఠశాలలు ప్రారంభించనున్నట్లు సీఎం వెల్లడించారు. ప్రభుత్వ పాఠశాలలో చేరే ప్రతి విద్యార్థికి నాణ్యమైన విద్య లభించేలా మౌలిక వసతులు, బోధనా ప్రమాణాల పెంపు, ఉపాధ్యాయ శిక్షణ వంటి అంశాలపై ప్రత్యేక దృష్టి సారించాలని ఆదేశించారు.

🧠 నైపుణ్యాభివృద్ధికి ప్రాధాన్యం

హైస్కూల్ స్థాయి నుంచే విద్యార్థుల్లో నైపుణ్యాలను అభివృద్ధి చేయడం ద్వారా వారు భవిష్యత్తులో తమకు ఇష్టమైన రంగాల్లో రాణించగలరని సీఎం అభిప్రాయపడ్డారు. విద్యార్థులకు భాషా పరిజ్ఞానం మాత్రమే కాకుండా సమగ్ర నైపుణ్యాలు అందేలా విద్యా విధానాల్లో మార్పులు తీసుకురావాలని అధికారులకు సూచించారు.

🏫 పట్టణాల్లో పాఠశాలలకు స్థలాల గుర్తింపు

పట్టణీకరణ వేగంగా జరుగుతున్న నేపథ్యంలో హెచ్ఎండీఏ, మున్సిపల్ లేఅవుట్లలో పాఠశాలలకు అవసరమైన స్థలాలను గుర్తించి, విద్యా శాఖ పురపాలక శాఖతో కలిసి సమన్వయం చేయాలని సీఎం సూచించారు.

📊 విద్యా సంస్థల హేతుబద్దీకరణ

ఎస్సీ, ఎస్టీ, బీసీ, మైనారిటీ విభాగాలకింద నడుస్తున్న వివిధ ఇంటర్మీడియట్ విద్యా సంస్థలను హేతుబద్ధీకరించి, ప్రతి పాఠశాలలో నిర్దిష్ట సంఖ్యలో విద్యార్థులు ఉండేలా చూడాలని సీఎం రేవంత్ ఆదేశించారు.

🍽️ డే స్కాలర్స్‌కు కూడా గురుకులాల సదుపాయాలు

గురుకుల విద్యా సంస్థల్లో నాణ్యమైన భోజనం, యూనిఫాంలు, పాఠ్య పుస్తకాలు అందుతున్న కారణంగా పెద్దఎత్తున విద్యార్థులు అవి ఎంచుకుంటున్నారని సీఎం చెప్పారు. అలాగే, డే స్కాలర్స్‌కు కూడా ఇలాంటి సదుపాయాలు అందేలా అధ్యయనం చేయాలని సూచించారు.

🧑‍⚕️ విద్యార్థుల మానసిక దృఢతకు కౌన్సెలింగ్

విద్యార్థుల్లో కుటుంబం, సమాజం పట్ల బాధ్యతాభావం పెంచేందుకు వారికి కౌన్సెలింగ్ అందించాలని సీఎం పేర్కొన్నారు. దీని వల్ల వారు mentall గా స్థిరంగా, బాధ్యతాయుతంగా ఎదుగుతారని ఆయన నమ్మకం వ్యక్తం చేశారు.

ఈ సమీక్ష సమావేశంలో ముఖ్యమంత్రి సలహాదారులు వేమ నరేందర్ రెడ్డి, కేశవరావు సహా విద్యాశాఖ ఉన్నతాధికారులు హాజరయ్యారు.