తెలంగాణ మున్సిపల్ ఎన్నికల బరిలో జనసేన త్వరలో ఎన్నికల కార్యాచరణ ప్రకటించనున్న పార్టీ నాయకత్వం

హైదరాబాద్, జనవరి 10: తెలంగాణలో త్వరలో జరగనున్న మున్సిపల్ ఎన్నికల నేపథ్యంలో జనసేన పార్టీ కీలక నిర్ణయం తీసుకుంది. రాష్ట్రవ్యాప్తంగా జరిగే మున్సిపల్ ఎన్నికల్లో పూర్తి స్థాయిలో పోటీకి సిద్ధమవుతున్నట్లు జనసేన ప్రకటించింది. గ్రేటర్ హైదరాబాద్ మున్సిపల్ కార్పొరేషన్ (GHMC)తో పాటు రాష్ట్రంలోని అన్ని మున్సిపాలిటీల్లోనూ అభ్యర్థులను నిలబెట్టాలని పార్టీ నిర్ణయించింది.

తెలంగాణలో పార్టీని బలోపేతం చేయడమే లక్ష్యంగా జిల్లా, నియోజకవర్గ, మున్సిపాలిటీ స్థాయిల్లో కమిటీలను ఏర్పాటు చేసే పనిని జనసేన వేగవంతం చేసింది. స్థానిక సంస్థల ఎన్నికలను పార్టీకి బలమైన పునాది వేసే అవకాశంగా భావిస్తున్న జనసేన, కేడర్‌ను పూర్తిగా సమాయత్తం చేస్తోంది.

ఈ ఎన్నికలకు సంబంధించిన పూర్తి కార్యాచరణ, వ్యూహాలు, అభ్యర్థుల ఎంపిక ప్రక్రియను త్వరలోనే ప్రకటించనున్నట్లు పార్టీ వర్గాలు వెల్లడించాయి. ప్రజా సమస్యలే అజెండాగా ఎన్నికల బరిలో దిగాలని జనసేన భావిస్తోంది. ముఖ్యంగా పట్టణ ప్రాంతాల్లో నెలకొన్న మౌలిక వసతుల లోపాలు, పారిశుద్ధ్యం, తాగునీటి సమస్యలు, అవినీతి వంటి అంశాలను ప్రజల ముందుకు తీసుకెళ్లేందుకు ప్రణాళిక రూపొందిస్తోంది.

ప్రచారానికి పార్టీ శ్రేణులు ఇప్పటి నుంచే సిద్ధం కావాలని జనసేన నేతలు పిలుపునిచ్చారు. గల్లీ గల్లీకి వెళ్లి ప్రజలతో మమేకమవుతూ పార్టీ విధానాలను వివరించాలని సూచించారు. యువత, మధ్యతరగతి ప్రజలు, నిరుద్యోగులు, పట్టణ పేదల సమస్యలపై ప్రత్యేకంగా దృష్టి సారించనున్నట్లు సమాచారం.

తెలంగాణ రాజకీయాల్లో ప్రత్యామ్నాయ శక్తిగా ఎదగాలనే లక్ష్యంతో జనసేన తీసుకుంటున్న ఈ నిర్ణయం, రానున్న మున్సిపల్ ఎన్నికల్లో ఆసక్తికర పరిణామాలకు దారితీయనుందని రాజకీయ విశ్లేషకులు భావిస్తున్నారు.