గాల్లో తేలినట్టుందే.. హుస్నాబాద్‌లో అబ్బురపరిచే గాజు వంతెన !

హుస్నాబాద్ : పర్యాటక రంగంలో సరికొత్త ఆకర్షణగా మారే మరో అద్భుతానికి హుస్నాబాద్ సిద్ధమవుతోంది. సిద్దిపేట జిల్లా పరిధిలోని ఎల్లమ్మ చెరువు వద్ద అత్యాధునిక సాంకేతికతతో నిర్మిస్తున్న రాష్ట్రంలోనే తొలి గాజు వంతెన (గ్లాస్ బ్రిడ్జి) పనులు తుది దశకు చేరుకున్నాయి. పర్యాటకులను ఆకర్షించేలా ప్రభుత్వం సుమారు రూ.18 కోట్ల వ్యయంతో చెరువు అభివృద్ధి పనులను చేపట్టింది.

ప్రేమ చిహ్నంగా ‘గ్లాస్ బ్రిడ్జి’

ఈ గాజు వంతెనను ప్రత్యేకంగా హృదయాకారంలో (లవ్ సింబల్) నిర్మిస్తున్నారు. సుమారు 150 మీటర్ల పొడవు, 1.5 మీటర్ల వెడల్పుతో రూపుదిద్దుకుంటున్న ఈ బ్రిడ్జిపై నడుస్తుంటే గాల్లో తేలుతున్నట్టే అనుభూతి కలుగుతుంది. పారదర్శక గాజు పలకల ద్వారా కింద ఉన్న నీరు స్పష్టంగా కనిపించడం, చుట్టూ ప్రకృతి సోయగాలు అలరించడం పర్యాటకులకు అరుదైన అనుభూతిని అందిస్తుంది.

సకల సౌకర్యాలతో అభివృద్ధి

ఎల్లమ్మ చెరువును ప్రముఖ పర్యాటక కేంద్రంగా తీర్చిదిద్దే దిశగా అధికారులు చర్యలు తీసుకుంటున్నారు. కోమటి చెరువు తరహాలోనే సుందరీకరణ పనులు చేపడుతున్నారు. సుమారు రూ.5 కోట్లతో నిర్మిస్తున్న గాజు వంతెనలో నాణ్యమైన, బలమైన గాజు పలకలు అమర్చారు. అదనంగా చెరువు కట్టపై అందమైన లైటింగ్, వాకింగ్ ట్రాక్, పచ్చదనం నిండిన గార్డెన్లు, ప్రత్యేక ఫోటో పాయింట్లు ఏర్పాటు చేస్తున్నారు. రాత్రివేళల్లో ఈ ప్రాంతం విద్యుత్ వెలుగులతో మెరిసిపోనుంది.

నెలలోపు అందుబాటులోకి

ఈ ప్రాజెక్టు పనులు వేగంగా కొనసాగుతున్నాయని మున్సిపల్ కమిషనర్ తెలిపారు. మరో 15 రోజుల నుంచి నెలలోపు అన్ని పనులు పూర్తి చేసి పర్యాటకులకు అందుబాటులోకి తీసుకువస్తామని వెల్లడించారు. ఈ గాజు వంతెన ప్రారంభమైతే హుస్నాబాద్ రాష్ట్ర పర్యాటక మ్యాప్‌లో ప్రత్యేక స్థానాన్ని సంపాదించుకోవడం ఖాయమని అధికారులు భావిస్తున్నారు.

👉 మొత్తానికి, ఈ గ్లాస్ బ్రిడ్జి ప్రారంభమైతే ప్రకృతి, సాంకేతికత కలయికతో హుస్నాబాద్ కొత్త పర్యాటక హబ్‌గా వెలుగొందనుంది.