కారుపై పడ్డ కొమ్మలు తొలగిస్తుండగా విద్యుత్ షాక్.. తండ్రి, కూతురు మృతి.. తల్లి పరిస్థితి విషమం

 

కారుపై పడ్డ కొమ్మలు తొలగిస్తుండగా విద్యుత్ షాక్.. తండ్రి, కూతురు మృతి.. తల్లి పరిస్థితి విషమం

హైదరాబాద్, జూన్ 13: అల్వాల్ పోలీస్ స్టేషన్ పరిధిలోని టెలికాం కాలనీలో శనివారం ఉదయం విషాద ఘటన చోటుచేసుకుంది. కారుపై పడిన చెట్టు కొమ్మలను తొలగించే క్రమంలో విద్యుత్ షాక్ తగలడంతో తండ్రి, కూతురు మృతి చెందగా, వారిని రక్షించేందుకు ప్రయత్నించిన తల్లి తీవ్రంగా గాయపడి ఆసుపత్రిలో చికిత్స పొందుతోంది.

పోలీసులు, స్థానికులు తెలిపిన వివరాల ప్రకారం.. శుక్రవారం రాత్రి కురిసిన భారీ వర్షాలకు ఇంటి ముందు పార్క్ చేసిన కారుపై చెట్టు కొమ్మలు విరిగి పడ్డాయి. శనివారం ఉదయం వాటిని తొలగించే ప్రయత్నంలో సందీప్ (44), ఆయన కుమార్తె రితిక (16) కారుపై ఉన్న కొమ్మలను తొలగిస్తుండగా, సమీపంలోని విద్యుత్ తీగలు ఆ కొమ్మలకు తగిలి ఉండటంతో ఒక్కసారిగా కరెంట్ ప్రవహించింది.

ఈ ఘటనలో రితిక విద్యుత్ షాక్‌కు గురికాగా, ఆమెను కాపాడేందుకు ప్రయత్నించిన తండ్రి సందీప్‌కు కూడా విద్యుత్ షాక్ తగిలింది. తీవ్ర విద్యుత్ ప్రభావంతో ఇద్దరూ అక్కడికక్కడే మృతి చెందారు.

అదే సమయంలో సహాయం చేసేందుకు వెళ్లిన సందీప్ భార్య శ్వేత (40)కు కూడా విద్యుత్ షాక్ తగలడంతో తీవ్రంగా గాయపడింది. కుటుంబ సభ్యులు, స్థానికులు వెంటనే ఆమెను సమీప ఆసుపత్రికి తరలించగా, ఆమె పరిస్థితి విషమంగా ఉన్నట్లు వైద్యులు వెల్లడించారు.

సమాచారం అందుకున్న అల్వాల్ పోలీసులు సంఘటనా స్థలానికి చేరుకుని ఘటనపై వివరాలు సేకరించారు. మృతదేహాలను పోస్టుమార్టం నిమిత్తం ఆసుపత్రికి తరలించి కేసు నమోదు చేశారు. ప్రమాదానికి కారణమైన పరిస్థితులపై పోలీసులు దర్యాప్తు చేపట్టారు.

ఈ విషాద ఘటన స్థానికంగా తీవ్ర విషాదాన్ని నింపింది. ఇటీవల కురుస్తున్న వర్షాల కారణంగా విద్యుత్ తీగలు, చెట్లు ప్రమాదకర పరిస్థితుల్లో ఉండటంతో ప్రజలు అప్రమత్తంగా ఉండాలని అధికారులు సూచిస్తున్నారు. ముఖ్యంగా విద్యుత్ తీగలకు సమీపంలో ఉన్న చెట్టు కొమ్మలను స్వయంగా తొలగించే ప్రయత్నం చేయకుండా సంబంధిత అధికారులకు సమాచారం అందించాలని నిపుణులు హెచ్చరిస్తున్నారు.