తెలంగాణలో ఘోర ప్రమాదం: ట్రావెల్స్ బస్సు దగ్ధం, ప్రయాణికులంతా సురక్షితం

 

మహబూబ్నగర్ జిల్లాలో ఘోర ప్రమాదం తప్పింది. జడ్చర్ల మండలంలోని మల్లెబోయినపల్లిలో ఓ ప్రైవేట్ ట్రావెల్స్ బస్సు దగ్ధమైంది. ప్రయాణంలో ఉన్నప్పుడు బస్సు టైరు పేలిపోయింది. దీని కారణంగా ఒక్కసారిగా మంటలు చెలరేగాయి.

డ్రైవర్ అప్రమత్తతతో వెంటనే స్పందించి బస్సును రోడ్డుపక్కన ఆపి ప్రయాణికులను కిందికి దించేందుకు ప్రయత్నించాడు. మంటలు వేగంగా వ్యాపించడంతో ప్రయాణికులంతా భయాందోళనకు గురై బస్సు నుంచి బయటకు పరుగులు తీశారు.

అయితే, అదృష్టవశాత్తు ఈ ఘటనలో ఎలాంటి ప్రాణనష్టం జరగలేదు. ప్రయాణికులంతా సురక్షితంగా బయటపడ్డారు. కానీ, బస్సు పూర్తిగా అగ్నికి ఆహుతైంది.

ప్రమాదం జరిగిన వెంటనే స్థానికులు, ఫైర్ సిబ్బంది ఘటనా స్థలానికి చేరుకుని మంటలను అదుపులోకి తీసుకువచ్చారు. అయితే బస్సు పూర్తిగా కాలిపోవడంతో భారీగా ఆస్తి నష్టం సంభవించినట్లు తెలుస్తోంది.

పోలీసులు ఈ ఘటనపై దర్యాప్తు ప్రారంభించారు. ప్రమాదానికి గల అసలు కారణాలను తెలియజేయడానికి బస్సు యాజమాన్యం, డ్రైవర్ నుంచి సమాచారం సేకరిస్తున్నారు.