సంచార ముస్లింల హక్కుల సాధనకు రాష్ట్రవ్యాప్త ఉద్యమం

ప్రత్యేక కార్పొరేషన్ ఏర్పాటు చేయాలి.. ఏటా రూ.1,000 కోట్ల బడ్జెట్ కేటాయించాలి

హామీలిచ్చి నాలుగేళ్లవుతున్నా అమలుకు నోచుకోలేదు.. ప్రభుత్వ తీరుపై సంచార ముస్లిం తెగల సంఘం ఆగ్రహం

హైదరాబాద్: సంచార ముస్లింలకు ఎన్నికల సమయంలో ఇచ్చిన హామీలను వెంటనే అమలు చేయాలని డిమాండ్ చేస్తూ తెలంగాణ రాష్ట్రవ్యాప్తంగా నిరసన ఉద్యమాలను ఉధృతం చేయాలని తెలంగాణ రాష్ట్ర సంచార ముస్లిం తెగల సంఘం (బీసీ-ఈ, 1–14) నిర్ణయించింది. సంచార ముస్లింల హక్కుల సాధన, భవిష్యత్తు కార్యాచరణపై హైదరాబాద్‌లో సంఘం నాయకులు, మేధావులు అత్యవసర సమావేశం నిర్వహించారు. ఈ సందర్భంగా ప్రభుత్వ హామీల అమలులో జరుగుతున్న జాప్యంపై నాయకులు తీవ్ర అసంతృప్తి వ్యక్తం చేశారు.

కాంగ్రెస్ ప్రభుత్వం అధికారంలోకి వచ్చినప్పటి నుంచి సంచార ముస్లింల సంక్షేమానికి సంబంధించి ఇచ్చిన హామీలను అమలు చేయడంలో నిర్లక్ష్యంగా వ్యవహరిస్తోందని నాయకులు విమర్శించారు. హామీల అమలుకు ఆరు నెలల గడువు ప్రకటించినప్పటికీ, ఇప్పటివరకు ఒక్క హామీ కూడా నెరవేరలేదని ఆరోపించారు. సంచార ముస్లింల సమస్యలను పరిష్కరించడంలో ప్రభుత్వం తక్షణమే స్పందించాలని డిమాండ్ చేశారు.

ప్రత్యేక కార్పొరేషన్ ఏర్పాటు చేయాలి

సంచార ముస్లింల సామాజిక, ఆర్థిక అభివృద్ధి కోసం ప్రత్యేకంగా సంచార ముస్లిం కార్పొరేషన్‌ను ఏర్పాటు చేయాలని, దాని ద్వారా సంక్షేమ పథకాలు అమలు చేసేందుకు ఏటా రూ.1,000 కోట్ల బడ్జెట్ కేటాయించాలని నాయకులు డిమాండ్ చేశారు. ఎన్నికల సమయంలో ఇచ్చిన హామీలను అమలు చేయకుండా ప్రభుత్వం కాలయాపన చేయడం సమంజసం కాదని పేర్కొన్నారు.

సంఘం వ్యవస్థాపకులు ఎండీ షబ్బీర్ మాట్లాడుతూ, సంచార ముస్లింలకు ఇచ్చిన హామీలను ప్రభుత్వం విస్మరించిందని విమర్శించారు. ఈ వైఖరిని ఇకపై సహించబోమని, హక్కుల సాధన కోసం త్వరలోనే రాష్ట్రవ్యాప్తంగా నిరసన కార్యక్రమాలు చేపడతామని హెచ్చరించారు.

సంఘం అధ్యక్షులు షేర్ అలీ మాట్లాడుతూ, ప్రభుత్వం ఏర్పడిన ఆరు నెలల్లోగా హామీలను అమలు చేస్తామని చెప్పినప్పటికీ, ఇప్పటివరకు ఎలాంటి పురోగతి లేదని ఆరోపించారు. వెంటనే ప్రత్యేక సంచార ముస్లిం కార్పొరేషన్ ఏర్పాటు చేసి, ఏటా రూ.1,000 కోట్ల నిధులు కేటాయించాలని డిమాండ్ చేశారు.

సంఘం కోశాధికారి ఎండీ షాదుల్లా మాట్లాడుతూ, సంచార ముస్లింలందరూ ఐక్యంగా ముందుకు వచ్చి తమ హక్కుల కోసం పోరాడాలని పిలుపునిచ్చారు. ఈ ఉద్యమం సంచార ముస్లింలలో కొత్త చైతన్యానికి నాంది కావాలని ఆకాంక్షించారు.

అన్ని సంఘాలు, పార్టీల మద్దతుతో పోరాటం

నాయకులు ఫకీర్ జహంగీర్, హుస్సేన్, బడేసాబ్, ముజహిద్, నిస్సార్ అహ్మద్ తదితరులు మాట్లాడుతూ, సంచార ముస్లింల సమస్యల పరిష్కారం కోసం అన్ని రాజకీయ పార్టీలు, కుల సంఘాలు, సామాజిక సంస్థలను కలుపుకొని దీర్ఘకాలిక ఉద్యమాలకు సిద్ధం కావాలని పిలుపునిచ్చారు. హక్కుల సాధన కోసం ఐక్య పోరాటమే మార్గమని స్పష్టం చేశారు.

సమావేశంలో పాల్గొన్న ప్రముఖులు

ఈ సమావేశంలో జానో జాగో జాతీయ అధ్యక్షులు నిస్సార్ అహ్మద్, యునైటెడ్ ముస్లిం స్టేట్ వర్కింగ్ ప్రెసిడెంట్, షైక్ ముస్లిం అధ్యక్షులు ముజహిద్, సలహాదారు వాసీమ్ అహ్మద్, పాస్మాండ ముస్లిం అధ్యక్షులు ఫకీర్ జహంగీర్, ఫకీర్ సంఘం వ్యవస్థాపకులు హుస్సేన్, సలహాదారు ప్రొఫెసర్ అన్వార్, దోబి ముస్లిం అధ్యక్షులు అబూబాకర్ పాల్గొన్నారు.

అలాగే రాష్ట్ర సభ్యులు హమీద్, ఉపాధ్యక్షులు ఖాసీం పాషా, యాకుబ్ గారడీ, జాయింట్ సెక్రటరీ సలీమ్, జిల్లా అధ్యక్షులు షాంసుద్దీన్, రసూల్, అబ్దుల్లా, ఫకీర్ ఖాజా, ఫకీర్ మౌలాలి, సయ్యద్ మౌలా సాబ్, ఫకీర్ హుస్సేన్, మొహమ్మద్ హుస్సేన్, షైక్ ఇమామ్ సాబ్, ఎండీ సలీమ్ తదితరులు హాజరయ్యారు. తుర్కాఖాస్ అధ్యక్షులు బడేసాబ్ దూరవాణి ద్వారా సమావేశ చర్చలో పాల్గొన్నారు.

సంచార ముస్లింలకు న్యాయం జరిగే వరకు ఉద్యమాన్ని కొనసాగిస్తామని, ప్రభుత్వం తమ డిమాండ్లపై సానుకూలంగా స్పందించి హామీలను అమలు చేయాలని తెలంగాణ రాష్ట్ర సంచార ముస్లిం తెగల సంఘం నాయకులు స్పష్టం చేశారు.