ఎమ్మెల్యే మాగంటి గోపీనాథ్ భౌతిక కాయానికి ఏపీ మంత్రి నారా లోకేష్ దంపతుల నివాళి

హైదరాబాద్, తెలంగాణ బీఆర్ఎస్ పార్టీకి చెందిన జూబ్లిహిల్స్ ఎమ్మెల్యే మాగంటి గోపీనాథ్ అకస్మాత్తుగా మరణించడంతో ఆయన కుటుంబంలో విషాదం నెలకొంది. ఈ నేపథ్యంలో, ఆంధ్రప్రదేశ్ ఐటీ, ఎలక్ట్రానిక్స్ శాఖ మంత్రి నారా లోకేష్ తన సతీమణి బ్రాహ్మణితో కలిసి మాగంటి గోపీనాథ్ నివాసానికి వచ్చి ఆయన భౌతికకాయానికి నివాళులు అర్పించారు.

ఈ సందర్భంగా మాగంటి గోపీనాథ్ మృతిపై లోకేష్ తీవ్ర దిగ్భ్రాంతి వ్యక్తం చేశారు. "గుండెపోటుతో ఆసుపత్రిలో చికిత్స పొందుతూ ఆయన ఆకస్మికంగా ప్రాణాలు కోల్పోవడం ఎంతో బాధాకరం. మాగంటి గారి మృతి నమ్మశక్యంగా లేదు" అని చెప్పారు.

నారా లోకేష్ మాట్లాడుతూ, మాగంటి గోపీనాథ్ రాజకీయ ప్రస్థానం తెలుగుదేశం పార్టీలో ప్రారంభమైందన్నారు. 1982లో టీడీపీలో చేరిన మాగంటి గారు, 1985లో హైదరాబాద్ నగర యువత అధ్యక్షుడిగా బాధ్యతలు నిర్వహించారని గుర్తుచేశారు. అనంతరం, 2014లో టీడీపీ తరపున ఎమ్మెల్యేగా ఎన్నికయ్యి వరుసగా మూడుసార్లు విజయం సాధించడం గర్వకారణమన్నారు.

"తన నియోజకవర్గ అభివృద్ధికి కృషి చేస్తూ, ప్రజల సమస్యలను పరిష్కరించడంలో ఆయన ఎప్పుడూ ముందు వరుసలో ఉండేవారు. రాజకీయంగా మంచి నాయకుడే కాకుండా, మానవత్వం కలిగిన వ్యక్తి కూడా మాగంటి గారు. ఆయన మరణం పార్టీకి, సమాజానికి తీరని లోటు" అని లోకేష్ పేర్కొన్నారు.

మాగంటి గోపీనాథ్ ఆత్మకు శాంతి చేకూరాలని భగవంతుడిని ప్రార్థించిన లోకేష్, వారి కుటుంబానికి ప్రగాఢ సానుభూతిని తెలిపారు. మాగంటి కుటుంబానికి ఎల్లప్పుడూ అండగా ఉండటానికి తాము సిద్ధంగా ఉన్నామని కూడా తెలిపారు.

ఈ సందర్భంగా పలువురు నేతలు, అభిమానులు మాగంటి గోపీనాథ్ నివాసానికి చేరుకొని నివాళులర్పిస్తున్నారు. ఆయన అకస్మాత్తు మృతి జూబ్లిహిల్స్ నియోజకవర్గ ప్రజలతో పాటు రాజకీయ వర్గాల్లో తీవ్ర విషాదాన్ని మిగిల్చింది.