ట్రాఫిక్ కష్టాలకు చెక్‌! హైదరాబాద్‌ బరిలోకి కొత్త బస్ టెర్మినల్‌
హైదరాబాద్‌, నిత్యం పెరిగిపోతున్న ట్రాఫిక్ భారం Hyderabad నగర ప్రజలను సతమతం చేస్తోంది. ముఖ్యంగా జిల్లా ప్రాంతాల నుంచి వచ్చే ఆర్టీసీ బస్సులు నగర కేంద్రానికి చేరుకునే సమయానికే ట్రాఫిక్‌లో చిక్కుకుపోతున్నాయి. ఈ సమస్యకు పరిష్కారంగా కొత్త ఇంటర్‌స్టేట్ బస్ టెర్మినల్‌ను ప్రతిపాదిస్తూ తెలంగాణ రాష్ట్ర రోడ్డు రవాణా సంస్థ (TSRTC) కీలక అడుగు వేసింది.
ఆరాంఘర్‌లో కొత్త టెర్మినల్‌ కేంద్రం:
జాతీయ రహదారి 44 పక్కన ఉన్న ఆరాంఘర్‌ ప్రాంతం ఈ ప్రాజెక్ట్‌కు ఎంపికైంది. ఇప్పటికే ఇక్కడ ఉన్న ఇండియన్ కౌన్సిల్ ఆఫ్ సోషల్ వెల్ఫేర్ భవనాల కోసం RTC రూ. 6 కోట్లు పరిహారంగా చెల్లించేందుకు అంగీకరించింది. 2025 జనవరిలోనే రవాణా శాఖ మంత్రి పొన్నం ప్రభాకర్ ఈ విషయమై రెవెన్యూశాఖకు లేఖ రాసినప్పటికీ, ప్రతిపాదన ఇప్పటికీ రంగారెడ్డి కలెక్టరేట్ వద్ద పెండింగ్‌లో ఉంది.
ఎంజీబీఎస్‌, జేబీఎస్‌లపై ఒత్తిడి తగ్గించాలన్న లక్ష్యం:
ప్రస్తుతం Hyderabadలో ఎంజీబీఎస్‌, జేబీఎస్‌ అనే రెండు ప్రధాన బస్ టెర్మినల్స్ ఉన్నాయి. అయితే రోజురోజుకు వాటిపై ఒత్తిడి పెరుగుతోంది. దక్షిణ తెలంగాణ (మహబూబ్‌నగర్, గద్వాల, వనపర్తి, నాగర్‌కర్నూల్) మరియు ఆంధ్రప్రదేశ్, కర్ణాటక వంటి రాష్ట్రాల నుంచి వచ్చే బస్సులు పెద్దఎత్తున ఎంజీబీఎస్‌ను చేరుకుంటున్నాయి. ఫలితంగా ట్రాఫిక్, సమయ ఆలస్యాలు తప్పడం లేదు.
కొత్త టెర్మినల్‌తో ప్రయాణికులకు లాభాలే లాభాలు:
కొత్త టెర్మినల్‌ ఏర్పాటు ద్వారా బస్సులు నగరంలోకి రాకుండా బయటే ఆగిపోతాయి. తద్వారా ప్రయాణికులకు సమయం ఆదా కావడమే కాదు, ప్రధాన రహదారులపై ట్రాఫిక్ తగ్గుతుంది. రాత్రిపూట వచ్చే బస్సులు ఆరాంఘర్‌ వద్దే ఆగితే, నగరప్రజలకు ట్రాఫిక్ భారాన్ని గణనీయంగా తగ్గించగలుగుతుందని RTC అధికారులు నమ్ముతున్నారు.
నాలుగు వైపులా టెర్మినల్స్ నిర్మాణం ప్రతిపాదన:
ఇటివల గడిచిన సంవత్సరాల్లో నగరానికి నాలుగు దిక్కులా టెర్మినల్స్ ఏర్పాటు చేయాలని ప్రతిపాదనలు వచ్చిన సంగతి తెలిసిందే. అయితే వాటిలో పూర్తి స్థాయి అభివృద్ధి జరగలేదు. తాజా ఆరాంఘర్‌ టెర్మినల్‌ విజయవంతమైతే, ఇలాంటి టెర్మినల్స్‌ను నగర నాలుగు మూలలకూ విస్తరించే అవకాశాలు ఉన్నాయి.
ఇప్పటికే భూ స్థలానికి సంబంధించి నివేదికలు సిద్ధంగా ఉన్నాయట. రంగారెడ్డి కలెక్టరేట్ నుంచి గ్రీన్ సిగ్నల్ రాగానే నిర్మాణం మొదలుకానుంది. ఒకవేళ ఇది సాకారమైతే, హైదరాబాద్‌ నగర ట్రాఫిక్ సమస్యకు ఒక దశ వరకు ఉపశమనం దక్కే అవకాశం ఉంది.
Post a Comment