టాలీవుడ్‌లో షూటింగ్స్ బంద్ — సమ్మె తీవ్రం
హైదరాబాద్‌ : టాలీవుడ్‌లో గత వారం రోజులుగా కొనసాగుతున్న సినీ కార్మికుల సమ్మె మరింత తీవ్రరూపం దాల్చింది. నిర్మాతల మండలి, ఫిల్మ్ ఛాంబర్‌తో జరిగిన చర్చలు విఫలమవడంతో, సోమవారం నుండి అన్ని తెలుగు సినిమాల షూటింగ్స్ బంద్ చేయాలని ఫిల్మ్ ఫెడరేషన్ నిర్ణయించింది.
ఇప్పటికే ఫిల్మ్ ఛాంబర్ నిర్మాతలకు “ఫెడరేషన్‌కి సహకరించి షూటింగ్స్ నిలిపివేయాలి” అని సూచించింది. ఈ నిర్ణయం వల్ల రాష్ట్రవ్యాప్తంగా సినిమా షూటింగ్స్ పూర్తిగా నిలిచిపోయే పరిస్థితి ఏర్పడింది.
పెద్ద సినిమాలకు భారీ ప్రభావం
ఈ సమ్మె కారణంగా ప్రస్తుతం కీలక దశలో ఉన్న పలువురు స్టార్‌ హీరోల చిత్రాలకు బ్రేక్ పడనుంది.
- చిరంజీవి – అనిల్ రావిపూడి కాంబినేషన్‌లో రూపొందుతున్న భారీ చిత్ర షూటింగ్ నిలిచిపోవడం వల్ల షెడ్యూల్స్ వృథా అయ్యే అవకాశం ఉంది.
- నందమూరి బాలకృష్ణ – బోయపాటి శ్రీను కాంబినేషన్‌లో తెరకెక్కుతున్న అఖండ 2 చివరి దశ షూటింగ్ కూడా నిలిచిపోనుంది.
షూటింగ్ ఆగిపోవడంతో బడ్జెట్ పెరుగుదల, రిలీజ్ తేదీల వాయిదా వంటి సమస్యలు తలెత్తే అవకాశముంది.
వేతనాల పెంపు డిమాండ్
ఫెడరేషన్ నేతలు మండిపడుతూ —
“మా వేతనాల పెంపును నిర్మాతలు పెద్ద సమస్యగా భావించడం లేదు. వేతనం అడిగితే కేసులు వేస్తారా? వచ్చే ఆదాయంలో మేము వాటాలు అడగడం లేదు” అన్నారు.
దసరా విడుదల లక్ష్యంగా ప్లాన్ చేసిన పలు చిత్రాలకు ఈ సమ్మె పెద్ద సవాలుగా మారింది.
Post a Comment