తమ్మునికి అక్క ఆఖరి రాఖీ... కలచివేసిన క్షణం
కూసుమంచి (ఖమ్మం): రాఖీ పౌర్ణమి సందడిలో ఒక అక్క తన తమ్ముడికి చివరి రాఖీ కట్టిన ఘటన ప్రతి ఒక్కరి మనసును కలచివేసింది. వైరల్ ఫీవర్‌తో బాధపడుతూ బుధవారం మరణించిన పందిరి అప్పి రెడ్డి (24) అంత్యక్రియల సమయంలో, అక్క జ్యోతి అతడి మృతదేహానికి రాఖీ కట్టి కన్నీళ్లు పెట్టిన సంఘటన అక్కడున్నవారిని తీవ్ర భావోద్వేగానికి గురిచేసింది.
అప్పిరెడ్డి ఖమ్మం జిల్లాలోని కూసుమంచి మండలం, కిష్టాపురం గ్రామానికి చెందినవాడు. గత కొన్ని రోజులుగా వైరల్ ఫీవర్‌తో బాధపడుతూ చికిత్స పొందుతున్నప్పటికీ, పరిస్థితి విషమించి బుధవారం అర్థరాత్రి ఆయన మృతిచెందాడు. కుటుంబ సభ్యులు శోకసంద్రంలో మునిగిపోయారు.
ఇక గురువారం ఉదయం గ్రామంలో జరిగిన అంత్యక్రియల్లో హృదయవిదారక దృశ్యాలు చోటుచేసుకున్నాయి. రాఖీ పౌర్ణమిని పురస్కరించుకొని, జ్యోతి తన మృత తమ్ముడి చేతికి రాఖీ కట్టి, “ఇదే నీకు చివరి రాఖీ అని ఏనాడూ ఊహించలేదు తమ్ముడా” అంటూ బోరున విలపించింది. ఆమె కన్నీటి వర్షం చూసి అక్కడున్న ప్రతి ఒక్కరూ కన్నీళ్లు ఆపుకోలేకపోయారు.
సాధారణంగా సోదరి ప్రేమను గుర్తుచేసే రాఖీ పండుగ ఈ కుటుంబానికి క్షణాల్లో విషాద పర్వదినంగా మారింది. అపారమైన ప్రేమకు గుర్తుగా చివరి రాఖీగా మిగిలిపోయిన ఈ ఘటన ఇప్పుడు గ్రామంలోనే కాకుండా, సమాజానికే ఉదాహరణగా మారింది.
Post a Comment