54వ డివిజన్ కాంగ్రెస్ అభ్యర్థిగా శిరసాని విజయలక్ష్మి నామినేషన్ దాఖలు

కొత్తగూడెం: త్వరలో జరగనున్న కొత్తగూడెం మున్సిపల్ కార్పొరేషన్ ఎన్నికల్లో 54వ డివిజన్ కాంగ్రెస్ పార్టీ అభ్యర్థిగా శిరసాని విజయలక్ష్మి శుక్రవారం అధికారికంగా తన నామినేషన్‌ను దాఖలు చేశారు. ఎన్నికల నేపథ్యంలో కాంగ్రెస్ పార్టీ బలమైన అభ్యర్థిని బరిలోకి దింపడంతో 54వ డివిజన్‌లో రాజకీయ ఉత్కంఠ నెలకొంది.

శిరసాని విజయలక్ష్మి అభ్యర్థిత్వాన్ని జిల్లా కాంగ్రెస్ పార్టీకి చెందిన దళిత నాయకులు అంతర్పుల కృష్ణ ప్రతిపాదించగా, జిల్లా మైనార్టీ కాంగ్రెస్ సీనియర్ నాయకులు షేక్ అబ్దుల్ సలాం, మహ్మద్ అఫీజుద్దీన్ నామినేషన్‌కు బలపరిచారు. ఈ సందర్భంగా కాంగ్రెస్ పార్టీ శ్రేణులు పెద్ద సంఖ్యలో హాజరై అభ్యర్థికి మద్దతుగా నినాదాలు చేశారు.

నామినేషన్ కార్యక్రమంలో పలువురు కాంగ్రెస్ నాయకులు, కార్యకర్తలు, మహిళా విభాగ నేతలు పాల్గొని శిరసాని విజయలక్ష్మికి శుభాకాంక్షలు తెలిపారు. 54వ డివిజన్‌లో అభివృద్ధి, ప్రజాసమస్యల పరిష్కారం, సంక్షేమ పథకాల అమలే తమ ప్రధాన అజెండా అని ఈ సందర్భంగా శిరసాని విజయలక్ష్మి పేర్కొన్నారు. ప్రజల ఆశీర్వాదంతో గెలుపు సాధించి డివిజన్‌ను అన్ని రంగాల్లో ముందుకు తీసుకెళ్తామని ఆమె ధీమా వ్యక్తం చేశారు.

కాంగ్రెస్ పార్టీ అధికారంలోకి వస్తే స్థానిక సమస్యలకు శాశ్వత పరిష్కారం చూపిస్తామని నాయకులు తెలిపారు. నామినేషన్ దాఖలుతో 54వ డివిజన్‌లో ఎన్నికల ప్రచారం మరింత ఊపందుకోనున్నట్లు రాజకీయ వర్గాలు విశ్లేషిస్తున్నాయి.