మున్సిపల్ ఎన్నికల ప్రచారానికి శ్రీకారం ఆదిలాబాద్ నుంచి సీఎం రేవంత్‌రెడ్డి పర్యటన

సంక్రాంతి పండుగ ముగియడంతో తెలంగాణలో రాజకీయ వాతావరణం ఒక్కసారిగా వేడెక్కింది. రానున్న మున్సిపల్ ఎన్నికలను దృష్టిలో పెట్టుకుని రాజకీయ పార్టీలు ప్రచారానికి సిద్ధమవుతున్నాయి. ఈ నేపథ్యంలో సీఎం రేవంత్‌రెడ్డి శుక్రవారం నుంచి అధికారికంగా మున్సిపల్ ఎన్నికల ప్రచారానికి శ్రీకారం చుట్టనున్నారు.

జనవరి 16న (శుక్రవారం) సీఎం రేవంత్‌రెడ్డి ఉమ్మడి ఆదిలాబాద్ జిల్లాలో పర్యటించనున్నారు. ఈ సందర్భంగా జిల్లాలో పలు అభివృద్ధి కార్యక్రమాలకు శంకుస్థాపనలు, ప్రారంభోత్సవాలు చేయనున్నారు. అనంతరం అక్కడ ఏర్పాటు చేసిన బహిరంగ సభలో ప్రజలనుద్దేశించి ప్రసంగించనున్నారు. ఈ పర్యటనతో మున్సిపల్ ఎన్నికల ప్రచారానికి అధికార కాంగ్రెస్ పార్టీ గట్టి సంకేతాలు ఇచ్చినట్టుగా రాజకీయ వర్గాలు భావిస్తున్నాయి.

డిసెంబర్‌లో జరిగిన పంచాయతీ ఎన్నికల్లో విజయం సాధించి సత్తా చాటిన కాంగ్రెస్ పార్టీ, అదే ఊపును మున్సిపల్ ఎన్నికల్లోనూ కొనసాగించాలని లక్ష్యంగా పెట్టుకుంది. ఈ క్రమంలో ఇప్పటికే సమగ్ర ఎన్నికల ప్రణాళికలను సిద్ధం చేసిన పార్టీ, సీఎం పర్యటనలతో ప్రచారాన్ని మరింత ఉధృతం చేయాలని నిర్ణయించింది.

మున్సిపల్ ఎన్నికలు సమీపిస్తున్న వేళ సీఎం స్వయంగా రంగంలోకి దిగడం రాజకీయంగా కీలకంగా మారింది.