రేపటి నుంచి ఎయిర్ ఫోర్స్ అగ్నివీర్ రిక్రూట్‌మెంట్ ర్యాలీ

హైదరాబాద్, మార్చి 08: నిరుద్యోగ యువతకు శుభవార్త. Indian Air Force లో అగ్నివీర్ రిక్రూట్‌మెంట్ ర్యాలీ గుంటూరులో నిర్వహించనున్నారు. ఈ నెల 9వ తేదీ నుంచి పెదకాకాని మండలంలోని Acharya Nagarjuna University ప్రాంగణంలో ఈ ర్యాలీ జరుగుతుందని హైదరాబాద్ ఎయిర్‌ఫోర్స్ రిక్రూటింగ్ అధికారి వింగ్ కమాండర్ షేక్ యాకూబ్ ఆలీ తెలిపారు.

ర్యాలీ షెడ్యూల్ ప్రకారం:

• మార్చి 9, 10: మహిళా అభ్యర్థులు
• మార్చి 12, 13: ఆంధ్రప్రదేశ్‌కు చెందిన పురుష అభ్యర్థులు
• మార్చి 15, 16: తెలంగాణకు చెందిన పురుష అభ్యర్థులు

పోటీలు ప్రతిరోజూ ఉదయం 6 గంటల నుంచి 10 గంటల వరకు నిర్వహించనున్నట్లు అధికారులు తెలిపారు.

అర్హతలు

ఈ ర్యాలీలో పాల్గొనాలంటే 2005 జూలై 2 నుంచి 2009 జనవరి 2 మధ్య జన్మించిన అవివాహిత మహిళలు, పురుషులు మాత్రమే అర్హులు. అభ్యర్థుల కనీస ఎత్తు 152 సెంటీమీటర్లు ఉండాలి.

అలాగే ఇంటర్మీడియట్ లేదా మూడేళ్ల డిప్లొమా ఇంజినీరింగ్ లేదా రెండేళ్ల వొకేషనల్ కోర్సులో కనీసం మొత్తం మార్కుల్లో 50 శాతం, ఇంగ్లీష్‌లో 50 శాతం మార్కులు సాధించి ఉత్తీర్ణులై ఉండాలి.

అవసరమైన పత్రాలు

అభ్యర్థులు తమ మెయిల్ ఐడీ, విద్యార్హత పత్రాలు, ప్రతి ధ్రువపత్రానికి 6 జిరాక్స్ కాపీలు, 10 పాస్‌పోర్ట్ సైజ్ ఫొటోలు తీసుకుని నేరుగా Acharya Nagarjuna Universityలో జరిగే ర్యాలీలో పాల్గొనవచ్చు.

ఎంపిక ప్రక్రియ

అభ్యర్థులకు

• 1.6 కిలోమీటర్ల పరుగు పందెం
• ఫిజికల్ టెస్ట్
• మెడికల్ పరీక్ష
• ఇంగ్లీష్, హిందీ భాషల్లో రాత పరీక్ష

నిర్వహిస్తారు. రాత పరీక్షలో తప్పు సమాధానానికి పావు మార్కు నెగిటివ్ మార్కింగ్ ఉంటుందని అధికారులు తెలిపారు.

జీతభత్యాలు – సేవా నిధి

ఎంపికైన అగ్నివీర్‌లు Indian Air Forceలో 4 సంవత్సరాల పాటు సేవలు అందిస్తారు. ఈ కాలం అనంతరం పనితీరు ఆధారంగా గరిష్టంగా 25 శాతం మందిని శాశ్వత కేడర్‌లో తీసుకుంటారు.

మొదటి సంవత్సరం రూ.30,000 జీతంతో ప్రారంభమై నాలుగో ఏడాది నాటికి రూ.40,000 వరకు పెరుగుతుంది. జీతంలో 30 శాతం సేవా నిధిగా కట్ చేసి, ప్రభుత్వం కూడా అంతే మొత్తాన్ని జమ చేస్తుంది. నాలుగేళ్ల తర్వాత వడ్డీతో కలిపి సుమారు రూ.11.71 లక్షలు ఒకేసారి అందజేస్తారు.

అదనంగా విధి నిర్వహణలో ఉండగా అగ్నివీర్‌లకు రూ.48 లక్షల లైఫ్ ఇన్సూరెన్స్ కవరేజ్ ఉంటుంది.