భయంతో తనువు చాలించి.. ఫలితాల్లో ‘పాస్‌’ – ఖమ్మంలో విషాదం

ఖమ్మం జిల్లా బోనకల్లు మండలంలో హృదయ విదారక ఘటన చోటుచేసుకుంది. పరీక్షల్లో ఫెయిల్ అవుతాననే భయంతో ప్రాణాలు తీసుకున్న ఓ విద్యార్థి, తరువాత విడుదలైన ఫలితాల్లో ఉత్తీర్ణుడిగా నిలవడం అందరినీ కలచివేసింది.

రాపల్లి గ్రామానికి చెందిన గంగదేవుల అక్షంత్ వైరాలోని ఓ ప్రైవేట్ కళాశాలలో ఇంటర్ ప్రథమ సంవత్సరం చదువుతున్నాడు. పరీక్షలు రాసిన తరువాత నుంచి తాను ఫెయిల్ అవుతాననే ఆందోళనతో తీవ్ర మానసిక ఒత్తిడికి గురయ్యాడు. ఈ భయంతోనే ఏప్రిల్ 9 అర్ధరాత్రి సమయంలో మధిర రైల్వే స్టేషన్ సమీపంలో రైలు కిందపడి ఆత్మహత్య చేసుకున్నాడు.

అయితే, ఆదివారం విడుదలైన ఇంటర్ ఫలితాల్లో అక్షంత్ ఎంపీసీ గ్రూపులో 347 మార్కులతో ఉత్తీర్ణుడిగా నిలిచిన విషయం వెలుగులోకి వచ్చింది. తన కుమారుడు ఫెయిల్ అవుతాననే భయంతో ప్రాణాలు తీసుకున్నప్పటికీ, అతను మంచి మార్కులతో పాస్ అయ్యాడని తెలుసుకున్న తల్లిదండ్రులు షాక్‌కు గురయ్యారు. ఫలితాల ప్రతిని చేతిలో పట్టుకుని వారు ఆవేదనతో విలపించిన దృశ్యాలు స్థానికులను కంటతడి పెట్టించాయి.

“కొంచెం ఓపికగా ఆలోచించి ఉండుంటే మా బిడ్డ మన కళ్లముందే ఉండేవాడు” అంటూ తల్లిదండ్రుల ఆర్తనాదం హృదయాలను కదిలించింది.

ఈ ఘటన విద్యార్థులకు ఒక గట్టి హెచ్చరికగా నిలుస్తోంది. పరీక్షల ఫలితాలు జీవితంలో ఒక చిన్న భాగమే కాని, ప్రాణం ఎంతో విలువైనది. ఎలాంటి పరిస్థితుల్లోనైనా ఆత్మహత్య వంటి ఆలోచనలకు దూరంగా ఉండి, సమస్యలను ధైర్యంగా ఎదుర్కోవాలని నిపుణులు సూచిస్తున్నారు.

👉 మీరు లేదా మీకు తెలిసిన ఎవరైనా ఇలాంటి మానసిక ఒత్తిడితో బాధపడుతున్నట్లయితే, వెంటనే కుటుంబ సభ్యులు, స్నేహితులు లేదా నిపుణులను సంప్రదించడం చాలా ముఖ్యం. సహాయం కోరడం బలహీనత కాదు, అది ఒక ధైర్య నిర్ణయం.