ఆర్టీసీ కార్మికుల సమ్మెబాట… బస్సులు బంద్ – ప్రయాణికుల తీవ్ర ఇబ్బందులు

Newsupta9, Apr 22: తెలంగాణ రాష్ట్రవ్యాప్తంగా టీజీఎస్ ఆర్టీసీ కార్మికుల సమ్మెతో బస్సు సర్వీసులు పూర్తిగా నిలిచిపోయాయి. కార్మికుల సమస్యల పరిష్కారం కోసం ప్రభుత్వంతో మంగళవారం జరిగిన చర్చలు విఫలం కావడంతో అర్ధరాత్రి నుంచే సమ్మె ప్రారంభమైంది. దీంతో రాష్ట్రంలోని అన్ని డిపోలలో బస్సులు ఎక్కడికక్కడే నిలిచిపోయాయి.

ఆర్టీసీ జేఏసీ పిలుపుతో కార్మికులు డిపోల వద్దే బంద్ పాటిస్తూ విధులకు హాజరుకాలేదు. తెల్లవారుజామున నుంచే బస్సు రాకపోకలు నిలిచిపోవడంతో ప్రయాణికులు తీవ్ర ఇబ్బందులు ఎదుర్కొంటున్నారు. ముఖ్యంగా విద్యార్థులు, ఉద్యోగులు, దినసరి ప్రయాణికులు గమ్యస్థానాలకు చేరుకోవడంలో ఇబ్బందులు పడుతున్నారు.

పరిస్థితిని దృష్టిలో ఉంచుకుని ప్రభుత్వం ముందస్తు చర్యగా ఆర్టీసీ డిపోల వద్ద భారీగా పోలీసులను మోహరించింది. ఎలాంటి అశాంతి చోటుచేసుకోకుండా అధికారులు నిఘా ఏర్పాటు చేశారు.

ఇదిలా ఉంటే, ఎన్నికల సమయంలో కాంగ్రెస్ పార్టీ ప్రకటించిన 32 హామీలను వెంటనే అమలు చేయాలని ఆర్టీసీ కార్మికులు డిమాండ్ చేస్తున్నారు. తమ సమస్యలు పరిష్కరించే వరకు సమ్మె కొనసాగిస్తామని జేఏసీ నాయకులు స్పష్టం చేశారు.

ప్రస్తుతం బస్సు సర్వీసులు నిలిచిపోవడంతో ప్రజలు ప్రత్యామ్నాయ రవాణా మార్గాలపై ఆధారపడాల్సి వస్తోంది. రాష్ట్రవ్యాప్తంగా ఈ సమ్మె ప్రభావం తీవ్రంగా కనిపిస్తోంది.