ఆన్‌లైన్ రమ్మీ వ్యసనం… ఐదుగురి ప్రాణాలు బలి!

తిరుపతి కుటుంబ విషాదం వెనుక ఆర్థిక కష్టాలు, వ్యసనం దారుణం

తిరుపతి జిల్లా, ఏప్రిల్ 24: తిరుపతి జిల్లాలో చోటుచేసుకున్న ఐదుగురి మృతి ఘటనకు సంబంధించి పోలీసులు సంచలన విషయాలను వెలుగులోకి తీసుకొచ్చారు. ఆన్‌లైన్ రమ్మీ వ్యసనంతో అప్పుల ఊబిలో చిక్కుకున్న ఓ వ్యక్తి తన కుటుంబాన్ని మొత్తం బలితీసుకున్న హృదయ విదారక ఘటన ఇది.

పోలీసులు తెలిపిన వివరాల ప్రకారం, నారాయణవనం మండలం వెంకటకృష్ణపాలెంకు చెందిన మోహన్ అనే వ్యక్తి బుధవారం తన తల్లి చంద్రకళ, భార్య హరితలను ఇంట్లోనే హత్య చేశాడు. అనంతరం స్కూల్‌కు వెళ్లి, మావయ్య చనిపోయాడని అబద్ధం చెప్పి తన పిల్లలు కౌశిక్‌ (14), హరిణి (12)లను ఇంటికి తీసుకువచ్చాడు.

ఇంట్లోకి పంపకుండా స్కూటీపై బయటకు తీసుకెళ్లిన మోహన్, చివరకు రైల్వే పట్టాల వద్దకు వెళ్లాడు. వేగంగా వస్తున్న రైలు కిందపడి ఆత్మహత్య చేసుకున్నాడు. తండ్రిని కాపాడేందుకు ప్రయత్నించిన పిల్లలిద్దరూ కూడా రైలు ఢీకొని అక్కడికక్కడే మృతి చెందారు. ఈ ఘటన స్థానికంగా తీవ్ర విషాదాన్ని మిగిల్చింది.

రూ.40 లక్షల అప్పులు… వ్యసనం దారుణానికి దారి

మోహన్ కొంతకాలంగా ఆన్‌లైన్ రమ్మీకి బానిసై సుమారు రూ.40 లక్షల వరకు అప్పులు చేసినట్లు పోలీసులు గుర్తించారు. ఉన్న ఆస్తులు, బంగారం అమ్మి అప్పులు తీర్చడానికి ప్రయత్నించినప్పటికీ, అప్పుల ఒత్తిడి తగ్గలేదు.

ఈ ఆర్థిక సమస్యలతో భార్యాభర్తల మధ్య తరచూ గొడవలు జరుగుతున్నాయని సమాచారం. తండ్రి మరణానంతరం వచ్చిన రైల్వే ఉద్యోగాన్ని కూడా మోహన్ వదిలేశాడు. కుటుంబ భారం మొత్తం భార్య హరిత భుజాన వేసుకుని బ్యూటీ పార్లర్, టైలరింగ్ చేస్తూ జీవనం సాగిస్తోంది.

ఇటీవల చీటీ డబ్బులతో భర్తకు సిమెంట్ షాపు ప్రారంభించినప్పటికీ, మోహన్ తన వ్యసనాన్ని నియంత్రించుకోలేక చివరకు ఈ దారుణానికి పాల్పడ్డాడు.

పోలీసుల దర్యాప్తు కొనసాగింపు

గురువారం ఐదు మృతదేహాలకు పోస్ట్‌మార్టమ్ నిర్వహించి, స్వగ్రామంలో అంత్యక్రియలు పూర్తి చేశారు. ఈ ఘటనపై పోలీసులు కేసు నమోదు చేసి దర్యాప్తు కొనసాగిస్తున్నారు.