టికెట్ ఇన్‌స్పెక్టర్ లంచం డిమాండ్.. చెప్పులతో దాడి చేసిన కండక్టర్, ప్రయాణికులు

హైదరాబాద్ నుంచి నారాయణఖేడ్ వెళ్తున్న ఆర్టీసీ బస్సులో సంచలన ఘటన చోటుచేసుకుంది. రాయికోడ్ వద్ద టికెట్ చెకింగ్ నిర్వహించిన అధికారులకు ఓ ప్రయాణికుడు టికెట్ లేకుండా ప్రయాణిస్తున్నట్లు తెలిసింది.

ఈ సందర్భంగా టికెట్ ఇన్‌స్పెక్టర్, ఆ ప్రయాణికుడితో పాటు బస్సు కండక్టర్‌పై కేసు నమోదు చేయకుండా ఉండాలంటే రూ.20 వేల లంచం ఇవ్వాలని డిమాండ్ చేసినట్లు ఆరోపణలు వెల్లువెత్తాయి.

ఇన్‌స్పెక్టర్ ప్రవర్తనపై ఆగ్రహం చెందిన కండక్టర్, ప్రయాణికులు అతనితో వాగ్వాదానికి దిగారు. పరిస్థితి ఉద్రిక్తంగా మారడంతో కండక్టర్‌తో పాటు కొందరు ప్రయాణికులు టికెట్ ఇన్‌స్పెక్టర్‌పై చెప్పులతో దాడి చేసిన ఘటన చోటుచేసుకుంది.

సమాచారం అందుకున్న పోలీసులు వెంటనే సంఘటన స్థలానికి చేరుకుని పరిస్థితిని అదుపులోకి తీసుకున్నారు. ఈ ఘటనపై రాయికోడ్ పోలీస్ స్టేషన్‌లో కేసు నమోదు చేసి దర్యాప్తు ప్రారంభించారు.

ఈ సంఘటనతో ఆర్టీసీ ఉద్యోగులు, ప్రయాణికుల మధ్య ఉన్న ఉద్రిక్తత మరోసారి బయటపడింది. లంచం డిమాండ్ చేసిన అధికారిపై కఠిన చర్యలు తీసుకోవాలని స్థానికులు డిమాండ్ చేస్తున్నారు.