తెలంగాణలో 14 మంది డిప్యూటీ కలెక్టర్లు, స్పెషల్ డిప్యూటీ కలెక్టర్లకు భారీ బదిలీలు..

తెలంగాణలో 14 మంది డిప్యూటీ కలెక్టర్లు, స్పెషల్ డిప్యూటీ కలెక్టర్లకు భారీ బదిలీలు.. 

హైదరాబాద్, జూన్ 5: తెలంగాణ రాష్ట్ర ప్రభుత్వం రెవెన్యూ శాఖలో కీలక పరిపాలనా మార్పులు చేపట్టింది. రాష్ట్రవ్యాప్తంగా పనిచేస్తున్న 14 మంది డిప్యూటీ కలెక్టర్లు, స్పెషల్ గ్రేడ్ డిప్యూటీ కలెక్టర్లను బదిలీ చేస్తూ రెవెన్యూ శాఖ గురువారం ఉత్తర్వులు జారీ చేసింది. పరిపాలనా అవసరాలు, శాఖ పనితీరును మరింత సమర్థవంతంగా నిర్వహించాలనే ఉద్దేశంతో ఈ బదిలీలు చేపట్టినట్లు అధికారులు తెలిపారు.

బదిలీల్లో భాగంగా యాదాద్రి భువనగిరి స్పెషల్ గ్రేడ్ డిప్యూటీ కలెక్టర్‌గా పనిచేస్తున్న బి. జయశ్రీని రాజన్న సిరిసిల్ల జిల్లా రెవెన్యూ అధికారిగా (డీఆర్వో) నియమించారు. ఇబ్రహీంపట్నం ఆర్డీవోగా ఉన్న కె. అనంత రెడ్డిని రంగారెడ్డి జిల్లా డీఆర్వోగా బదిలీ చేశారు. ఇటీవల పదోన్నతి పొందిన ఎం. దేవదాస్‌ను నిర్మల్ ఆర్డీవోగా, డి. శ్రీధర్ బాబును సిరిసిల్ల ఆర్డీవోగా నియమించారు.

మహబూబాబాద్ ఆర్డీవో కాసుల కృష్ణవేణిని ములుగు ఆర్డీవోగా బదిలీ చేయగా, ఎం. రాజేశ్వరిని మహబూబాబాద్ ఆర్డీవోగా నియమించారు. రంగారెడ్డి స్పెషల్ గ్రేడ్ డిప్యూటీ కలెక్టర్ వై. శ్రీనివాస్ రెడ్డిని ఇబ్రహీంపట్నం ఆర్డీవోగా, కె.సి. ప్రమీలను యాదాద్రి భువనగిరి స్పెషల్ గ్రేడ్ డిప్యూటీ కలెక్టర్‌గా పోస్టింగ్ ఇచ్చారు. వెయిటింగ్‌లో ఉన్న కె. నారాయణను హైదరాబాద్ డీఆర్వోగా, లా ఆఫీసర్ డి. శ్రీధర్‌ను రాజేంద్రనగర్ ఆర్డీవోగా నియమించారు.

అలాగే రాజేంద్రనగర్ ఆర్డీవోగా పనిచేస్తున్న కొప్పుల వెంకట్ రెడ్డికి పెద్దపల్లి అదనపు కలెక్టర్ (రెవెన్యూ)గా పదోన్నతి కల్పించారు. హన్మకొండకు చెందిన తహసీల్దార్ జి. సదానందంను ఖమ్మం ఐపీటీ అండ్ రైల్వే స్పెషల్ డిప్యూటీ కలెక్టర్‌గా బదిలీ చేశారు. ఇటీవల సస్పెన్షన్ అనంతరం తిరిగి విధుల్లో చేరిన ఎం. షర్మిలను కరీంనగర్ ఆర్డీవోగా నియమించడం రెవెన్యూ వర్గాల్లో చర్చనీయాంశంగా మారింది.

రాష్ట్రంలో ఇటీవల వరుసగా రెవెన్యూ శాఖలో బదిలీలు జరుగుతున్న నేపథ్యంలో ఈ తాజా ఉత్తర్వులు ప్రాధాన్యత సంతరించుకున్నాయి. జిల్లా స్థాయి పరిపాలనను మరింత బలోపేతం చేయడంతో పాటు రెవెన్యూ వ్యవస్థలో సమన్వయాన్ని పెంపొందించేందుకు ప్రభుత్వం ఈ నిర్ణయాలు తీసుకున్నట్లు తెలుస్తోంది. సంబంధిత అధికారులు వెంటనే తమ కొత్త బాధ్యతలు స్వీకరించాలని ప్రభుత్వం ఆదేశాలు జారీ చేసింది.