ప్రియుడి కోసం కన్నకొడుకును హత్య చేసిన తల్లి.. కేసు భయంతో ఆస్పత్రిలో మృతి

 

ప్రియుడి కోసం కన్నకొడుకును హత్య చేసిన తల్లి.. కేసు భయంతో ఆస్పత్రిలో మృతి

కర్నూలు జిల్లాలోని జి. హోసళ్లి గ్రామంలో జరిగిన దారుణ ఘటన వెలుగులోకి రావడంతో స్థానికంగా తీవ్ర సంచలనం నెలకొంది. వివాహేతర సంబంధం కారణంగా ఓ తల్లి తన ప్రియుడితో కలిసి కన్నకొడుకును హత్య చేసిన ఘటన ఆలస్యంగా బయటపడింది.

పోలీసుల వివరాల ప్రకారం, గంగమ్మ అనే మహిళకు దర్గప్ప అనే వ్యక్తితో వివాహేతర సంబంధం ఉన్నట్లు తెలుస్తోంది. ఈ విషయాన్ని ఆమె 15 ఏళ్ల కుమారుడు వీరేంద్ర ప్రశ్నించడంతో ఆగ్రహానికి గురైన గంగమ్మ, తన ప్రియుడితో కలిసి బాలుడిపై కత్తితో దాడి చేసి హత్య చేసినట్లు విచారణలో వెల్లడైంది. అనంతరం ఎవరికి అనుమానం రాకుండా బాలుడి మృతదేహాన్ని గ్రామ శ్మశాన వాటికలో రహస్యంగా పాతిపెట్టినట్లు అధికారులు గుర్తించారు.

కుమారుడు కనిపించడం లేదంటూ పోలీసులకు ఫిర్యాదు

హత్య అనంతరం గంగమ్మే తన కుమారుడు కనిపించడం లేదంటూ పోలీసులకు ఫిర్యాదు చేయడం గమనార్హం. అంతేకాకుండా కేసు దర్యాప్తు మందగించిందంటూ ఆమె హైకోర్టును కూడా ఆశ్రయించినట్లు సమాచారం. దీంతో కేసుపై ప్రత్యేక దృష్టి సారించిన సిట్ అధికారులు లోతైన విచారణ చేపట్టారు.

సిట్ విచారణలో వెలుగులోకి వచ్చిన నిజం

హైకోర్టు ఆదేశాల మేరకు దర్యాప్తు వేగవంతం చేసిన సిట్ అధికారులు సేకరించిన ఆధారాలు, అనుమానితుల విచారణలో గంగమ్మ, ఆమె ప్రియుడు దర్గప్పే ఈ హత్యకు పాల్పడినట్లు తేలింది. దీంతో రెవెన్యూ, వైద్య అధికారుల సమక్షంలో శ్మశాన వాటికలో పాతిపెట్టిన వీరేంద్ర మృతదేహాన్ని వెలికితీసి పోస్టుమార్టం కోసం తరలించారు.

విచారణ భయంతో తల్లి మృతి

కేసు దర్యాప్తు ముమ్మరంగా సాగుతున్న సమయంలో నిందితురాలు గంగమ్మ తీవ్ర అనారోగ్యానికి గురైంది. ఆమెను చికిత్స నిమిత్తం కర్నూలు ప్రభుత్వ ఆసుపత్రికు తరలించగా, అక్కడ చికిత్స పొందుతూ మరణించినట్లు అధికారులు తెలిపారు.

వివాహేతర సంబంధం నేపథ్యంలో కన్నకొడుకే ప్రాణాలు కోల్పోవడం, అనంతరం నిందితురాలు కూడా మృతి చెందడం జిల్లాలో తీవ్ర చర్చనీయాంశంగా మారింది. కేసులో మిగిలిన నిందితుడిపై పోలీసులు తదుపరి చట్టపరమైన చర్యలు కొనసాగిస్తున్నారు.