మావోయిస్టు డివిజన్ కమిటీ సభ్యురాలు నక్కా సుశీల రాణి లొంగుబాటు
మావోయిస్టు డివిజన్ కమిటీ సభ్యురాలు నక్కా సుశీల రాణి లొంగుబాటు
నిజామాబాద్ సీపీ ఎదుట లొంగుబాటు.. తెలంగాణలో మావోయిస్టు కార్యకలాపాలకు గట్టి దెబ్బ
స్పెషల్ ఇంటెలిజెన్స్ బ్యూరో (SIB), గ్రేహౌండ్స్, జిల్లా పోలీసుల సమన్వయంతో చేపట్టిన వ్యూహాత్మక చర్యలు, నిరంతర నిఘా కారణంగా మావోయిస్టు కార్యకలాపాలకు గట్టి దెబ్బ తగిలిందని అధికారులు తెలిపారు. హింసామార్గాన్ని వీడి జనజీవన స్రవంతిలో కలిసేందుకు ప్రభుత్వం అందిస్తున్న లొంగుబాటు, పునరావాస విధానాలపై అవగాహన పెరగడం కూడా లొంగుబాట్లకు కారణమవుతోందని వెల్లడించారు.
ఈ ఏడాది 266 మంది లొంగుబాటు
2026లో ఇప్పటివరకు తెలంగాణలో మొత్తం 266 మంది అజ్ఞాత మావోయిస్టులు లొంగిపోయినట్లు పోలీసు శాఖ తెలిపింది. వీరిలో ముగ్గురు కేంద్ర కమిటీ సభ్యులు, 12 మంది రాష్ట్ర కమిటీ సభ్యులు, ఒక ప్రాంతీయ కమిటీ సభ్యుడు, 25 మంది డివిజనల్ కమిటీ కార్యదర్శులు/సభ్యులు ఉన్నారు.
అదేవిధంగా 94 మంది ఏరియా కమిటీ సభ్యులు, 131 మంది సాధారణ మావోయిస్టులు కూడా లొంగిపోయినట్లు అధికారులు వివరించారు. అగ్రస్థాయి నాయకత్వం నుంచి క్షేత్రస్థాయి క్యాడర్ వరకు పెద్ద సంఖ్యలో లొంగిపోవడంతో తెలంగాణలో మావోయిస్టు పార్టీ నెట్వర్క్ తీవ్రంగా దెబ్బతిన్నదని పోలీసు అధికారులు పేర్కొన్నారు.
ముగ్గురు కీలక నేతలే అజ్ఞాతంలో..
ప్రస్తుతం తెలంగాణకు చెందిన ముప్పాళ్ల లక్ష్మణ్రావు (గణపతి), జడె రత్నబాయి (సుజాత), వార్త శేఖర్ (మంగు) అనే ముగ్గురు నేతలు మాత్రమే ఇతర రాష్ట్రాల్లో పనిచేస్తూ అజ్ఞాతంలో ఉన్నట్లు పోలీసు అధికారులు వెల్లడించారు.
సుశీల రాణి లొంగుబాటుతో తెలంగాణలో మావోయిస్టు పార్టీ మరింత బలహీనపడిందని పోలీసులు తెలిపారు. అజ్ఞాతంలో ఉన్న మిగిలిన నేతలు, క్యాడర్ కూడా హింసామార్గాన్ని వీడి ప్రభుత్వం అందిస్తున్న లొంగుబాటు, పునరావాస పథకాలను వినియోగించుకుని సాధారణ జనజీవన స్రవంతిలో కలవాలని పోలీసు శాఖ విజ్ఞప్తి చేసింది.
తెలంగాణలో శాంతి, భద్రతల పరిరక్షణతో పాటు మావోయిస్టు ప్రభావిత ప్రాంతాల్లో అభివృద్ధి, ప్రజలకు మెరుగైన సేవలు అందించడంపై ప్రభుత్వం, పోలీసు శాఖ దృష్టి సారిస్తున్నాయని అధికారులు పేర్కొన్నారు.
Post a Comment