రూ.లక్ష లంచం తీసుకుంటూ ఇద్దరు ACBకి చిక్కిన అధికారులు

హైదరాబాద్: సెప్టెంబర్ 10: తెలంగాణ సచివాలయంలో ఔట్‌సోర్సింగ్ ఉద్యోగిగా పనిచేస్తున్న వ్యక్తితో పాటు తెలంగాణ స్టేట్ ఇండస్ట్రియల్ డెవలప్‌మెంట్ కార్పొరేషన్ (TSIDC)లో సీనియర్ అసిస్టెంట్‌గా పనిచేస్తున్న మరో ఉద్యోగి అవినీతి నిరోధక శాఖ (ACB) వలకు చిక్కారు. అధికారిక పని చేయడానికి లంచం డిమాండ్ చేసి స్వీకరిస్తుండగా ACB అధికారులు రెడ్‌హ్యాండెడ్‌గా పట్టుకున్నారు.

ACB తెలిపిన వివరాల ప్రకారం.. హైదరాబాద్‌లోని తెలంగాణ సచివాలయంలో ఔట్‌సోర్సింగ్ ఉద్యోగిగా పనిచేస్తున్న ఆనందేశి రాఘవేందర్ (AO-1), బషీర్‌బాగ్‌లోని పరిశ్రమ భవన్‌లో ఉన్న TSIDC కార్యాలయంలో సీనియర్ అసిస్టెంట్‌గా పనిచేస్తున్న మేడి వినోద్ (AO-2) లంచం కేసులో నిందితులుగా ఉన్నారు.

ఫిర్యాదుదారుడికి ముఖ్యమంత్రి సహాయ నిధి (CMRF) పథకం కింద మంజూరైన వైద్య ఖర్చుల రీయింబర్స్‌మెంట్‌ను ప్రాసెస్ చేయడంతో పాటు, మంజూరైన రూ.2 లక్షల మొత్తానికి చెక్కు జారీ చేయడం, మిగిలిన వైద్య రీయింబర్స్‌మెంట్ క్లెయిమ్‌ను తదుపరి ప్రాసెస్ చేయడానికి నిందితులు లంచం డిమాండ్ చేసినట్లు ACB పేర్కొంది.

ఈ వ్యవహారంలో ముందుగా AO-1 అయిన రాఘవేందర్.. ఫిర్యాదుదారుడి నుంచి AO-2 వినోద్ ద్వారా రూ.5,000 లంచం PhonePe లావాదేవీ ద్వారా తీసుకున్నట్లు ACB తెలిపింది.

తాజాగా అధికారిక పని చేయడానికి రూ.1,00,000 లంచం డిమాండ్ చేయడంతో ఫిర్యాదుదారు ACBని ఆశ్రయించారు. దీంతో రంగంలోకి దిగిన సిటీ రేంజ్-2 ACB అధికారులు సెప్టెంబర్ 10న వల పన్ని నిందితులను పట్టుకున్నారు.

ACB ప్రకారం.. ఫిర్యాదుదారుడి నుంచి AO-2 మేడి వినోద్ రూ.1 లక్ష లంచాన్ని స్వీకరించి, ఆ మొత్తాన్ని AO-1 రాఘవేందర్‌కు అందజేశాడు. అనంతరం ACB అధికారులు రాఘవేందర్ వద్ద నుంచి రూ.1,00,000 విలువైన లంచం సొమ్మును స్వాధీనం చేసుకున్నారు.

అధికారులు తమ విధులను సక్రమంగా నిర్వర్తించకుండా, అనుచితంగా మరియు నిజాయితీకి విరుద్ధంగా వ్యవహరించి అక్రమ ప్రయోజనం పొందేందుకు ప్రయత్నించినట్లు ACB పేర్కొంది.

నిందితులను నాంపల్లిలోని SPE & ACB కేసుల కోసం ఏర్పాటు చేసిన I అదనపు ప్రత్యేక న్యాయస్థానంలో హాజరుపరిచి జ్యుడీషియల్ రిమాండ్‌కు తరలించనున్నట్లు ACB తెలిపింది. ఈ కేసు దర్యాప్తు కొనసాగుతోంది. ఫిర్యాదుదారుడి భద్రత దృష్ట్యా ఆయన వివరాలను ACB అధికారులు వెల్లడించలేదు.

లంచం డిమాండ్ చేస్తే 1064కు ఫిర్యాదు చేయండి

ప్రభుత్వ ఉద్యోగి ఎవరైనా లంచం డిమాండ్ చేస్తే ప్రజలు వెంటనే తెలంగాణ ACB టోల్‌ఫ్రీ నంబర్ 1064కు ఫిర్యాదు చేయాలని అధికారులు సూచించారు. అలాగే వాట్సాప్: 9440446106 ద్వారా కూడా ACBని సంప్రదించవచ్చని తెలిపారు.

తెలంగాణ ACBను సోషల్ మీడియా వేదికలైన Facebookలో Telangana ACB, Xలో @Telangana ACB పేర్లతో సంప్రదించవచ్చని పేర్కొన్నారు. రాష్ట్రంలోని అన్ని ప్రభుత్వ కార్యాలయాలు, ముఖ్యమైన ప్రదేశాల్లో ACB QR కోడ్‌ను ఏర్పాటు చేసినట్లు అధికారులు తెలిపారు.

లంచంపై ఫిర్యాదు చేసే బాధితులు, ఫిర్యాదుదారుల పేర్లు మరియు వ్యక్తిగత వివరాలను గోప్యంగా ఉంచుతామని ACB స్పష్టం చేసింది.