కాళ్లు, చేతులు కట్టేసి నీళ్ల సంపులో పడేసి హత్య

కాళ్లు, చేతులు కట్టేసి నీళ్ల సంపులో పడేసి హత్య.. చిన్నారి హత్య కేసులో సెక్యూరిటీ గార్డుపై అనుమానాలు!

సికింద్రాబాద్: ఆరేళ్ల చిన్నారి కిడ్నాప్, హత్య ఘటన హైదరాబాద్‌లో తీవ్ర కలకలం రేపింది. సికింద్రాబాద్‌లోని బొల్లారం పోలీస్‌స్టేషన్‌ పరిధి కౌకూర్‌లో ఈ విషాద ఘటన వెలుగుచూసింది. శనివారం రాత్రి కిడ్నాప్‌కు గురైన చిన్నారి దారుణ హత్యకు గురికావడంతో కుటుంబ సభ్యులు కన్నీరుమున్నీరవుతున్నారు. ఈ ఘటనతో స్థానికులు తీవ్ర దిగ్భ్రాంతికి గురయ్యారు.

డబ్బులు డిమాండ్ చేసిన నిందితుడు?

అందిన సమాచారం ప్రకారం.. చిన్నారిని కిడ్నాప్ చేసిన అనంతరం విక్రమ్ అనే వ్యక్తి కుటుంబ సభ్యులకు ఫోన్ చేసి డబ్బులు డిమాండ్ చేసినట్లు తెలుస్తోంది. ఈ క్రమంలో పోలీసులు రంగంలోకి దిగడంతో తాను పట్టుబడతాననే భయంతో చిన్నారిని హత్య చేసి ఉండవచ్చని పోలీసులు అనుమానిస్తున్నారు. చిన్నారి కాళ్లు, చేతులు కట్టేసి నీళ్ల సంపులో పడేసినట్లు సమాచారం.

మొబైల్ సిగ్నల్స్ ఆధారంగా గాలింపు

చిన్నారి హత్య అనంతరం నిందితుడు విక్రమ్ సికింద్రాబాద్ వైపు వెళ్లినట్లు పోలీసులు గుర్తించినట్లు సమాచారం. అతడి మొబైల్ ఫోన్ సిగ్నల్స్ ఆధారంగా ప్రత్యేక బృందాలు గాలింపు చర్యలు చేపట్టాయి. సికింద్రాబాద్ రైల్వే స్టేషన్‌తో పాటు పలు ప్రాంతాలు, బస్టాండ్లలో అర్ధరాత్రి వరకు తనిఖీలు నిర్వహించినట్లు తెలుస్తోంది.

ఈ కేసు విచారణలో భాగంగా ఇద్దరు బీహార్‌కు చెందిన వ్యక్తులను పోలీసులు అదుపులోకి తీసుకుని ప్రశ్నిస్తున్నట్లు సమాచారం. అయితే ఈ ఘటనలో వారి పాత్రపై అధికారికంగా పూర్తి వివరాలు వెల్లడికావాల్సి ఉంది.

నిందితుడిని కఠినంగా శిక్షించాలని డిమాండ్

కౌకూర్‌లోని విల్లా ఆర్చిడ్స్ నివాసితులు, స్థానికులు చిన్నారి హత్య ఘటనతో తీవ్ర ఆవేదన వ్యక్తం చేస్తున్నారు. తమ చిన్నారిని కోల్పోయిన తల్లిదండ్రులు కన్నీరుమున్నీరవుతున్నారు. నిందితుడిని వెంటనే అరెస్టు చేసి, చట్టప్రకారం కఠినంగా శిక్షించాలని వారు డిమాండ్ చేస్తున్నారు.

పోలీసుల దర్యాప్తులో మరిన్ని వివరాలు వెలుగులోకి రావాల్సి ఉంది. నిందితుడిగా పేర్కొన్న వ్యక్తిపై ఆరోపణలు, ఇతరుల ప్రమేయం వంటి అంశాలు దర్యాప్తులో తేలాల్సి ఉంది.