ఇష్టం లేని పెళ్లి సంబంధం.. రైలులో నుంచి దూకి యువతి ఆత్మహత్య

 ఇష్టం లేని పెళ్లి సంబంధం.. రైలులో నుంచి దూకి యువతి ఆత్మహత్య

ఈ నెల 29న జరగాల్సిన వివాహం.. అంతలోనే విషాదం.. కన్నీరుమున్నీరవుతున్న తల్లిదండ్రులు

భద్రాద్రి కొత్తగూడెం జిల్లా: ఇష్టం లేని పెళ్లి సంబంధం, అనారోగ్య సమస్యలతో మనస్తాపానికి గురైన ఓ యువతి రైలులో నుంచి దూకి ప్రాణాలు తీసుకున్న విషాద ఘటన జనగామ జిల్లా రఘునాథపల్లి మండల పరిధిలో శనివారం తెల్లవారుజామున చోటుచేసుకుంది. చేతికొచ్చిన కుమార్తె పెళ్లి చేసుకుని కొత్త జీవితంలోకి అడుగుపెట్టాల్సిన సమయంలో విగతజీవిగా మారడంతో తల్లిదండ్రులు, కుటుంబ సభ్యులు కన్నీరుమున్నీరుగా విలపిస్తున్నారు.

రైల్వే హెడ్‌ కానిస్టేబుల్‌ ఉపేందర్‌ తెలిపిన వివరాల ప్రకారం.. జనగామ జిల్లా నర్మెట మండలం అమ్మాపురం గ్రామానికి చెందిన కుంటి బాబురావు కుటుంబం సుమారు 20 ఏళ్ల క్రితం భద్రాద్రి కొత్తగూడెం జిల్లా లక్ష్మీదేవిపల్లి మండలం శేషగిరినగర్‌ కాలనీకి వలస వచ్చి స్థిరపడింది. బాబురావు ఎలక్ట్రీషియన్‌గా పనిచేస్తూ కుటుంబాన్ని పోషిస్తున్నాడు. ఆయన కుమార్తె శ్రావణి (24) ప్రైవేట్‌ ఉద్యోగం చేస్తూ కుటుంబానికి అండగా ఉంటోంది.

చిన్నప్పటి నుంచి తల్లిదండ్రుల గారాలపట్టిగా పెరిగిన శ్రావణికి కొంతకాలం క్రితం మేనబావతో వివాహం నిశ్చయించారు. ఈ నెల 29న వివాహం జరగాల్సి ఉండగా, పెళ్లి ఏర్పాట్లలో భాగంగా దుస్తులు కొనుగోలు చేసేందుకు ఆమె హైదరాబాద్‌ వెళ్లాలని నిర్ణయించుకుంది.

రైలు ప్రయాణంలో చోటుచేసుకున్న విషాదం

గత నెల 30వ తేదీ శుక్రవారం రాత్రి శ్రావణి మణుగూరు ఎక్స్‌ప్రెస్‌ రైలులో సికింద్రాబాద్‌కు బయలుదేరింది. ప్రయాణ సమయంలో ఒకట్రెండుసార్లు కుటుంబ సభ్యులతో ఫోన్‌లో మాట్లాడింది. అయితే ఖమ్మం సమీపానికి రైలు చేరుకున్న తర్వాత కుటుంబ సభ్యులు ఆమెకు ఫోన్‌ చేయగా స్పందన లేకపోవడంతో ఆందోళన చెందారు.

శనివారం తెల్లవారుజామున సుమారు 2.30 గంటల సమయంలో జనగామ జిల్లా రఘునాథపల్లి మండల శివారు ప్రాంతంలో రైలులో నుంచి దూకినట్లు రైల్వే పోలీసులు గుర్తించారు.

టికెట్‌ ఆధారంగా గాలింపు.. పట్టాల పక్కన మృతదేహం గుర్తింపు

శ్రావణి ఫోన్‌ కాల్స్‌కు స్పందించకపోవడంతో కుటుంబ సభ్యులు ఆమె రిజర్వేషన్‌ టికెట్‌ను హైదరాబాద్‌లో నివసిస్తున్న మేనబావకు పంపించారు. దీంతో అతను వెంటనే జనగామ రైల్వే స్టేషన్‌కు చేరుకున్నాడు. రైలు స్టేషన్‌లో ఆగిన వెంటనే రిజర్వేషన్‌ బోగీలోకి వెళ్లి పరిశీలించగా శ్రావణికి సంబంధించిన బ్యాగు మాత్రమే కనిపించింది. ఆమె ఆచూకీ లేకపోవడంతో వెంటనే రైల్వే పోలీసులకు సమాచారం అందించాడు.

సమాచారం అందుకున్న పోలీసులు అప్రమత్తమై గాలింపు చర్యలు చేపట్టారు. ఈ క్రమంలో రఘునాథపల్లి సమీపంలోని రైల్వే పట్టాల పక్కన శ్రావణి మృతదేహాన్ని గుర్తించారు. కుటుంబ సభ్యులు మృతదేహాన్ని పరిశీలించి ఆమెగా నిర్ధారించారు.

పెళ్లి సందడి ఉండాల్సిన ఇంట్లో విషాదం

మేనబావతో వివాహం చేసుకోవడం ఇష్టం లేకపోవడం, అనారోగ్య సమస్యల కారణంగా శ్రావణి తీవ్ర మనస్తాపానికి గురైనట్లు రైల్వే పోలీసులు ప్రాథమికంగా వెల్లడించారు. అయితే ఘటనకు సంబంధించిన పూర్తి కారణాలపై దర్యాప్తు కొనసాగుతోంది.

ఉద్యోగం చేస్తూ జీవితంలో స్థిరపడుతున్న కుమార్తెకు పెళ్లి చేసి అత్తారింటికి పంపించాలనుకున్న తల్లిదండ్రులకు ఈ ఘటన తీరని విషాదాన్ని మిగిల్చింది. పెళ్లి బాజాలు మోగాల్సిన ఇంట్లో ఒక్కసారిగా విషాద ఛాయలు అలుముకున్నాయి.

మృతురాలి తల్లిదండ్రుల ఫిర్యాదు మేరకు రైల్వే హెడ్‌ కానిస్టేబుల్‌ ఉపేందర్‌ కేసు నమోదు చేశారు. జనగామ జిల్లా ఆస్పత్రిలో పోస్టుమార్టం నిర్వహించిన అనంతరం మృతదేహాన్ని కుటుంబ సభ్యులకు అప్పగించారు. ఘటనపై తదుపరి దర్యాప్తు కొనసాగుతున్నట్లు పోలీసులు తెలిపారు.