రాష్ట్రంలో పెరుగుతున్న చలి తీవ్రత.. రానున్న రోజుల్లో పరిస్థితి ఇదే!

 

తెలంగాణ ప్రజలకు వాతావరణ శాఖ అలర్ట్.. రాష్ట్రంలో పెరుగుతున్న చలి తీవ్రత.. రానున్న రోజుల్లో పరిస్థితి ఇదే!

హైదరాబాద్: తెలంగాణ రాష్ట్రంలో వాతావరణ పరిస్థితులు క్రమంగా మారుతున్నాయి. గత కొన్ని రోజులుగా రాష్ట్రంలోని పలు జిల్లాల్లో కురిసిన వర్షాలు తగ్గుముఖం పట్టడంతో చలితీవ్రత పెరుగుతోంది. ముఖ్యంగా రాత్రి, తెల్లవారుజామున ఉష్ణోగ్రతలు క్రమంగా పడిపోతుండటంతో ప్రజలు చలితో ఇబ్బందులు ఎదుర్కొంటున్నారు. రానున్న రోజుల్లో రాత్రి ఉష్ణోగ్రతలు మరింత తగ్గే అవకాశం ఉందని వాతావరణ శాఖ వెల్లడించింది.

హైదరాబాద్‌లోనూ పెరుగుతున్న చలి

నవంబర్ నెల ప్రారంభం కావడంతో రాష్ట్రంలో శీతాకాల ప్రభావం క్రమంగా పెరుగుతోంది. రాజధాని హైదరాబాద్‌లో రాత్రి ఉష్ణోగ్రతలు 17 నుంచి 19 డిగ్రీల సెల్సియస్ మధ్య నమోదవుతున్నాయి. తెల్లవారుజామున రాజేంద్రనగర్, శంషాబాద్, మేడ్చల్, ఘట్‌కేసర్ తదితర శివారు ప్రాంతాల్లో పొగమంచు కమ్ముకుంటోంది.

ఉదయం 8 గంటల వరకు చలి ప్రభావం ఎక్కువగా ఉంటుండగా, పగటిపూట మాత్రం ఎండ తీవ్రత సాధారణంగానే ఉంటోంది. సాయంత్రం 5:30 గంటల తర్వాత చల్లని గాలులు ప్రారంభమవుతుండటంతో రాత్రి వేళల్లో చలి ఎక్కువగా అనిపిస్తోంది.

ఉత్తర తెలంగాణ జిల్లాల్లో మరింత ప్రభావం

రాష్ట్రంలోని ఉత్తర తెలంగాణ జిల్లాల్లో చలి తీవ్రత ఎక్కువగా కనిపిస్తోంది. ఆదిలాబాద్, కుమురం భీం ఆసిఫాబాద్, నిర్మల్, నిజామాబాద్, మెదక్, సంగారెడ్డి జిల్లాల్లో కనిష్ఠ ఉష్ణోగ్రతలు 14 నుంచి 16 డిగ్రీల సెల్సియస్ మధ్య నమోదవుతున్నట్లు సమాచారం.

ముఖ్యంగా ఏజెన్సీ ప్రాంతాల్లో సాధారణం కంటే 2 నుంచి 3 డిగ్రీల వరకు తక్కువ ఉష్ణోగ్రతలు నమోదవుతున్నాయి. దీంతో గ్రామీణ, అటవీ ప్రాంతాల్లో తెల్లవారుజామున చలి ప్రభావం మరింత ఎక్కువగా ఉంటోంది.

ప్రస్తుతం వర్ష సూచన లేదు

ఇటీవల వరుస తుపానుల ప్రభావంతో తెలంగాణలోని పలు జిల్లాల్లో మోస్తరు నుంచి భారీ వర్షాలు కురిసిన విషయం తెలిసిందే. అయితే ప్రస్తుతం వర్షాల ప్రభావం తగ్గిపోయింది. ఈశాన్య దిశ నుంచి వీస్తున్న పొడి గాలుల కారణంగా రాష్ట్రవ్యాప్తంగా వర్షాలు కురిసే అవకాశాలు లేవని వాతావరణ కేంద్రం తెలిపింది.

రానున్న రోజుల్లో రాష్ట్రంలో పొడి వాతావరణం కొనసాగడంతో పాటు రాత్రి ఉష్ణోగ్రతలు మరింత తగ్గే అవకాశం ఉందని అంచనా వేస్తున్నారు.

ప్రజలు తీసుకోవాల్సిన జాగ్రత్తలు

చలి తీవ్రత పెరుగుతున్న నేపథ్యంలో ముఖ్యంగా వృద్ధులు, చిన్నపిల్లలు తగిన జాగ్రత్తలు తీసుకోవాలి. తెల్లవారుజామున, రాత్రి వేళల్లో బయటకు వెళ్లేటప్పుడు వెచ్చని దుస్తులు ధరించాలి. పొగమంచు కమ్ముకున్న సమయంలో వాహనదారులు వేగం తగ్గించి ప్రయాణించడం మంచిది.

మొత్తంగా తెలంగాణలో వర్షాల ప్రభావం తగ్గి చలిపులి పంజా విసురుతోంది. రానున్న రోజుల్లో ఉష్ణోగ్రతలు మరింత పడిపోయే అవకాశం ఉండటంతో ప్రజలు అప్రమత్తంగా ఉండాలని వాతావరణ పరిస్థితులను గమనించాలని సూచిస్తున్నారు.