డోర్నకల్ ప్రభుత్వ ఆసుపత్రికి దుస్థితి.. అత్యవసర వైద్యం కరువు!

ప్రమాద బాధితులకు ప్రాథమిక చికిత్సే దిక్కు.. 25 నుంచి 30 కిలోమీటర్ల దూరంలోని ఆసుపత్రులకు రిఫర్

డోర్నకల్: నియోజకవర్గ కేంద్రంగా ఉన్న డోర్నకల్ పట్టణంలోని ప్రభుత్వ సామాజిక ఆరోగ్య కేంద్రం సమస్యలతో కొట్టుమిట్టాడుతోంది. పూర్తిస్థాయి వైద్య సదుపాయాలు, ఆధునిక వైద్య పరికరాలు, అత్యవసర చికిత్స విభాగం అందుబాటులో లేకపోవడంతో రోగులు తీవ్ర ఇబ్బందులు ఎదుర్కొంటున్నారు. నియోజకవర్గ కేంద్రానికి చుట్టుపక్కల గ్రామాల నుంచి నిత్యం పెద్ద సంఖ్యలో రోగులు వస్తున్నప్పటికీ, వారికి అవసరమైన స్థాయిలో వైద్య సేవలు అందడం లేదన్న విమర్శలు వ్యక్తమవుతున్నాయి.

ముఖ్యంగా రోడ్డు, రైలు ప్రమాదాలు జరిగినప్పుడు క్షతగాత్రులను ఆసుపత్రికి తీసుకొస్తే ప్రాథమిక చికిత్స అందించి జిల్లా కేంద్రంలోని ఆసుపత్రులకు రిఫర్ చేస్తున్నారని స్థానికులు ఆవేదన వ్యక్తం చేస్తున్నారు. అత్యవసర పరిస్థితుల్లో గోల్డెన్ అవర్‌లో అందాల్సిన వైద్యం అందకపోవడంతో బాధితుల ప్రాణాలకు ముప్పు ఏర్పడుతోందని ఆందోళన వ్యక్తం చేస్తున్నారు.

అత్యవసర పరిస్థితుల్లో తప్పని ప్రయాణం

డోర్నకల్ రైల్వే జంక్షన్ కావడంతో నిత్యం ప్రయాణికులు, స్థానికులతో ఈ ప్రాంతం రద్దీగా ఉంటుంది. చుట్టుపక్కల గ్రామాలకు కూడా డోర్నకల్ ప్రధాన కేంద్రంగా ఉంది. ఇలాంటి ప్రాంతంలో ప్రమాదాలు, గుండెపోటు వంటి అత్యవసర పరిస్థితులు తలెత్తినప్పుడు వెంటనే మెరుగైన వైద్యం అందించే సౌకర్యాలు లేకపోవడం సమస్యగా మారింది.

అత్యవసర వైద్య పరీక్షలు, అవసరమైన పరికరాలు, నిపుణులైన వైద్యులు అందుబాటులో లేకపోవడంతో సుమారు 25 కిలోమీటర్ల దూరంలోని మహబూబాబాద్‌, 30 కిలోమీటర్ల దూరంలోని ఖమ్మం ప్రభుత్వ ఆసుపత్రులకు రోగులను తరలించాల్సి వస్తోందని ప్రజలు చెబుతున్నారు. ఈలోగా చికిత్స ఆలస్యమై ప్రాణనష్టం జరిగే ప్రమాదం ఉందని ఆందోళన చెందుతున్నారు.

50 పడకల ఆసుపత్రిగా అప్‌గ్రేడ్‌కు ప్రతిపాదనలు

ప్రజల ఆశలు, ఆకాంక్షలకు అనుగుణంగా డోర్నకల్ సామాజిక ఆరోగ్య కేంద్రాన్ని అభివృద్ధి చేసేందుకు చర్యలు తీసుకుంటున్నామని స్థానిక ఎమ్మెల్యే, ప్రభుత్వ విప్ రామచంద్రనాయక్ తెలిపారు. ఆసుపత్రిని 50 పడకల స్థాయికి అప్‌గ్రేడ్ చేయాలని ప్రభుత్వానికి ప్రతిపాదనలు పంపినట్లు వెల్లడించారు.

ప్రభుత్వ నిబంధనల ప్రకారం ప్రభుత్వ మెడికల్ కాలేజీ, జిల్లా ప్రభుత్వ ఆసుపత్రికి 30 కిలోమీటర్లకు పైగా దూరంలో ఉన్న ప్రాంతాలకే 50 పడకల ఆసుపత్రి మంజూరుకు అవకాశం ఉంటుందని వివరించారు. ఈ నేపథ్యంలో డోర్నకల్‌లో 30 పడకల ఆసుపత్రి ఏర్పాటు దిశగా ప్రభుత్వం కసరత్తు చేస్తోందని తెలిపారు. 24 గంటల పాటు నిపుణులైన వైద్యులతో మెరుగైన వైద్య సేవలు అందించేందుకు ప్రత్యేక కృషి చేస్తున్నట్లు పేర్కొన్నారు.

అలాగే యువతకు ఉపాధి అవకాశాలు కల్పించాలనే లక్ష్యంతో జిల్లాలోనే మొట్టమొదటి ఐటీఐ కళాశాలను డోర్నకల్‌లో ఏర్పాటు చేసేందుకు ప్రయత్నాలు చేస్తున్నట్లు ఎమ్మెల్యే వెల్లడించారు.

ప్రాథమిక ఆరోగ్య కేంద్రం స్థాయిలో సేవలు: డీఎంహెచ్‌ఓ

డోర్నకల్ సామాజిక ఆరోగ్య కేంద్రంలో ప్రస్తుతం మండల కేంద్రంలోని ప్రాథమిక ఆరోగ్య కేంద్రంలో అందించాల్సిన వైద్య సేవలనే అందిస్తున్నామని జిల్లా వైద్య ఆరోగ్య శాఖ అధికారి డాక్టర్ బి. రవి రాథోడ్ పేర్కొన్నారు. ఆసుపత్రిని ఆధునీకరించడం ద్వారా స్థానిక ప్రజలకు మెరుగైన వైద్య సేవలు అందించేందుకు అవకాశం ఉంటుందని తెలిపారు. స్థానిక ఎమ్మెల్యే రామచంద్రనాయక్ 50 పడకల ఆసుపత్రిగా అప్‌గ్రేడ్ చేయాలని ప్రభుత్వానికి ప్రతిపాదనలు పంపినట్లు వివరించారు.

ప్రజల ప్రధాన డిమాండ్ ఒక్కటే.. అత్యవసర వైద్యం అందుబాటులోకి రావాలి. ఆసుపత్రి స్థాయిని పెంచడంతో పాటు పూర్తిస్థాయి వైద్యులు, అవసరమైన వైద్య పరికరాలు, అత్యవసర చికిత్స విభాగం, 24 గంటల వైద్య సేవలు అందుబాటులోకి తీసుకురావాలని డోర్నకల్ ప్రజలు కోరుతున్నారు.