ఇందిరా గాంధీ జయంతి సందర్భంగా ఘన నివాళులు.. నెక్లెస్ రోడ్డులో కాంగ్రెస్ నేతల పుష్పాంజలి!
ఇందిరా గాంధీ జయంతి సందర్భంగా ఘన నివాళులు.. నెక్లెస్ రోడ్డులో కాంగ్రెస్ నేతల పుష్పాంజలి!
హైదరాబాద్: భారత మాజీ ప్రధాని, ఉక్కు మహిళగా పేరుగాంచిన దివంగత ఇందిరా గాంధీ జయంతి సందర్భంగా హైదరాబాద్ నెక్లెస్ రోడ్డులోని ఆమె విగ్రహానికి కాంగ్రెస్ నాయకులు ఘనంగా నివాళులర్పించారు. టీపీసీసీ అధ్యక్షుడు, ఎమ్మెల్సీ మహేష్ కుమార్ గౌడ్ పుష్పమాలలు వేసి పుష్పాంజలి ఘటించారు.
ఈ కార్యక్రమంలో రాష్ట్ర మంత్రులు సీతక్క, పొన్నం ప్రభాకర్, ఎంపీ అనిల్ కుమార్ యాదవ్, టీపీసీసీ ఉపాధ్యక్షుడు జగదీశ్వర్ రావు, మాజీ మంత్రులు దానం నాగేందర్, గీతారెడ్డి, కార్పొరేషన్ చైర్మన్ మెట్టు సాయికుమార్ తదితరులు పాల్గొన్నారు.
ఈ సందర్భంగా మహేష్ కుమార్ గౌడ్ మాట్లాడుతూ.. ప్రపంచవ్యాప్తంగా ఉక్కు మహిళగా కీర్తించబడిన ఇందిరా గాంధీ తీసుకున్న నిర్ణయాలు నేటికీ ఎంతోమంది నాయకులకు మార్గదర్శకంగా నిలుస్తున్నాయని అన్నారు. దేశాభివృద్ధి, పేద ప్రజల సంక్షేమమే లక్ష్యంగా ఆమె నిరంతరం కృషి చేశారని కొనియాడారు.
పేదరిక నిర్మూలన కోసం ఇందిరా గాంధీ ఇచ్చిన 'గరీబీ హటావో' నినాదం ఆమె నిబద్ధతకు నిదర్శనమని పేర్కొన్నారు. పేదల అభ్యున్నతికి, గుడిసెలు లేని గ్రామాల నిర్మాణానికి ఆమె విశేష ప్రాధాన్యత ఇచ్చారని గుర్తుచేశారు.
దేశం కోసం అనునిత్యం శ్రమించిన ఇందిరా గాంధీ ఆశయాలను కొనసాగించడమే ఆమెకు అందించే నిజమైన నివాళి అని మహేష్ కుమార్ గౌడ్ తెలిపారు. సీఎం రేవంత్ రెడ్డి నాయకత్వంలోని రాష్ట్ర ప్రభుత్వం ఇందిరమ్మ ఇళ్ల పథకం ద్వారా పేదల సొంతింటి కలను సాకారం చేసేందుకు కృషి చేస్తోందని వెల్లడించారు.
కాంగ్రెస్ అగ్రనేత సోనియా గాంధీ రచించిన పుస్తకాన్ని ప్రతి ఒక్కరూ చదవాలని, తద్వారా ఇందిరా గాంధీ జీవితం, దేశం కోసం ఆమె చేసిన సేవలను మరింతగా తెలుసుకోవాలని ఆయన సూచించారు.

Post a Comment