ఎన్టీఆర్ వర్థంతి: తాతకు నివాళి అర్పించిన ఎన్టీఆర్, కళ్యాణ్ రామ్

హైదరాబాద్: తెలుగుదేశం పార్టీ వ్యవస్థాపకులు, దివంగత మాజీ ముఖ్యమంత్రి నందమూరి తారక రామారావు (ఎన్టీఆర్) 29వ వర్థంతి సందర్భంగా కుటుంబ సభ్యులు, రాజకీయ నేతలు, అభిమానులు ఘనంగా నివాళులర్పించారు.

ఎన్టీఆర్ ఘాట్ వద్ద ప్రత్యేక కార్యక్రమాలు

హైదరాబాద్‌లోని ఎన్టీఆర్ ఘాట్ వద్ద కుటుంబ సభ్యులు నివాళులు అర్పించారు. ఉదయం 8 గంటలకు నందమూరి బాలకృష్ణ ఘాట్‌కు చేరుకుని నివాళులర్పించారు. ఆ తర్వాత 8.30 గంటలకు ఆంధ్రప్రదేశ్ మంత్రి నారా లోకేష్ అక్కడికి చేరుకుని నివాళులు అర్పించారు.

అమరజ్యోతి ర్యాలీ

ఉదయం 9 గంటలకు రసూల్‌పురలో ఎన్టీఆర్ విగ్రహం నుంచి "ఎన్టీఆర్ అమరజ్యోతి ర్యాలీ"ను బాలకృష్ణ ప్రారంభించారు. అనంతరం 10 గంటలకు బసవతారకం క్యాన్సర్ ఆస్పత్రిలో తల్లిదండ్రుల విగ్రహాలకు బాలకృష్ణ నివాళులర్పించారు.

జూనియర్ ఎన్టీఆర్, కళ్యాణ్ రామ్ హాజరు

జూనియర్ ఎన్టీఆర్, కళ్యాణ్ రామ్ కూడా ఎన్టీఆర్ ఘాట్‌కు చేరుకుని తాతకు నివాళి అర్పించారు. వారు ఘాట్ వద్ద కొంతసేపు ఉండి, ఎన్టీఆర్ సమాధి చుట్టూ తిరిగి పూలమాలలతో ఘనంగా నివాళులర్పించారు. జూనియర్ ఎన్టీఆర్‌ను చూడటానికి ఘాట్ వద్దకు అభిమానులు భారీగా తరలి రావడం గమనార్హం.

ఈ కార్యక్రమంలో పాల్గొన్న నందమూరి, నారా కుటుంబ సభ్యులంతా ఎన్టీఆర్ సేవలను స్మరించుకున్నారు.