జర్నలిస్టుల నిరసనకు మద్దతుగా బీఆర్ఎస్ నేత కాపు సీతాలక్ష్మి

 

కొత్తగూడెం, తెలంగాణలో జర్నలిస్టుల హక్కుల కోసం సాగుతున్న ఉద్యమానికి బీఆర్ఎస్ పార్టీ మద్దతు ప్రకటించింది. కొత్తగూడెం పట్టణంలో జర్నలిస్టులు తమకుతగిన ఇండ్ల స్థలాల కోసం చేస్తున్న నిరసనకు సంఘీభావంగా బీఆర్ఎస్ పార్టీ నాయకురాలు, మాజీ మున్సిపల్ చైర్ పర్సన్ కాపు సీతాలక్ష్మి పాల్గొని మాట్లాడారు.

సీతాలక్ష్మి మాట్లాడుతూ, తెలంగాణ రాష్ట్ర తొలి ముఖ్యమంత్రి కే. చంద్రశేఖర్ రావు హయాంలో మాజీ ఎమ్మెల్యే వనమా వెంకటేశ్వరరావు ఆధ్వర్యంలో మున్సిపాలిటీలో ఏకగ్రీవ తీర్మానం చేసి జర్నలిస్టులకు 10 ఎకరాల స్థలం కేటాయించారని గుర్తు చేశారు. అయితే కొత్త ప్రభుత్వం వచ్చి 16 నెలలు గడుస్తున్నా, ఇంకా జర్నలిస్టులకు ఆ స్థలాలను అప్పగించకపోవడం వారి హక్కులను కాలరాయడమేనని ఆమె విమర్శించారు.

ప్రభుత్వంపై విమర్శలు

కాపు సీతాలక్ష్మి మాట్లాడుతూ, గత ప్రభుత్వం జర్నలిస్టుల కోసం ఇండ్ల స్థలాలను మంజూరు చేసినప్పటికీ, కాంగ్రెసు ప్రభుత్వం అధికారంలోకి వచ్చిన తరువాత ఆ ప్రక్రియను ఆపివేశారని ఆరోపించారు. ముఖ్యమంత్రి రేవంత్ రెడ్డి చిత్తశుద్ధితో జర్నలిస్టుల సమస్యను పరిష్కరించాలని డిమాండ్ చేశారు.

అలాగే, కొత్తగూడెం ఎమ్మెల్యే కునంనేని సాంబశివరావు జర్నలిస్టులకు సాధారణ రేటులోనే ఇండ్ల స్థలాలను మంజూరు చేసేలా చర్యలు తీసుకోవాలని కోరారు. కరోనా మహమ్మారి సమయంలో కూడా జర్నలిస్టులు తమ ప్రాణాలను సైతం పణంగా పెట్టి ప్రజల కోసం పని చేశారని, కొందరు కరోనా బారిన పడి ప్రాణాలు కోల్పోయారని ఆవేదన వ్యక్తం చేశారు.

జర్నలిస్టుల ఉద్యమానికి బీఆర్ఎస్ మద్దతు

కాపు సీతాలక్ష్మి భవిష్యత్తులో జర్నలిస్టులు చేపట్టే ప్రతి ఉద్యమానికి బీఆర్ఎస్ పార్టీ మద్దతుగా ఉంటుందని ప్రకటించారు. ఈ కార్యక్రమంలో మాజీ వైస్ చైర్మన్ వేల్పుల దామోదర్, మాజీ కౌన్సిలర్లు వేముల ప్రసాద్, అంబుల వేణుగోపాల్ తదితరులు పాల్గొన్నారు.

జర్నలిస్టుల హక్కుల సాధన కోసం పోరాటం కొనసాగుతుందని, ప్రభుత్వం వెంటనే స్పందించి వారికి న్యాయం చేయాలని కార్యకర్తలు డిమాండ్ చేశారు.