జులై 9న జరిగే దేశవ్యాప్త సమ్మెను జయప్రదం చేయండి: కాపు కృష్ణ

కేంద్ర ప్రభుత్వం తీసుకొచ్చిన కార్మిక వ్యతిరేక విధానాలను ఖండిస్తూ జులై 9న జరిగే దేశవ్యాప్త సమ్మెను విజయవంతం చేయాలని తెలంగాణ బొగ్గుగని కార్మిక సంఘం (టీబీజీకేఎస్) రాష్ట్ర ప్రధాన కార్యదర్శి కాపు కృష్ణ పిలుపునిచ్చారు. శనివారం సత్తుపల్లి జేవీఆర్ ఓపెన్‌కాస్ట్‌లో ఏర్పాటు చేసిన కార్మిక సంఘాల జేఏసీ సమావేశంలో ఆయన మాట్లాడారు.

ఈ సందర్భంగా కాపు కృష్ణ మాట్లాడుతూ – "దేశంలో కార్మిక హక్కులను హరించే విధంగా కేంద్ర ప్రభుత్వం నడుచుకుంటోంది. 44 కార్మిక చట్టాలను కుదించి నాలుగు లేబర్ కోడ్లుగా మార్చడం వెనక లక్ష్యం కార్మికుల న్యాయపూర్వక హక్కులను కాలరాయడం. కార్పొరేట్ కంపెనీలకు అనుకూలంగా పని చేసి, కార్మికులను బానిసలుగా మలచే కుట్రను అమలు చేయడమే ప్రధాన ఉద్దేశం. ఇందుకు ప్రతిగా దేశవ్యాప్తంగా జరుగుతున్న సమ్మెకు ప్రతి కార్మికుడు మద్దతు ఇవ్వాలి. ఈ సమ్మె కేంద్ర ప్రభుత్వానికి గట్టి సందేశంగా నిలవాలి” అని పిలుపునిచ్చారు.

అతనితోపాటు జేఏసీ నాయకులు, కార్మిక సంఘాల నేతలు – టీబీజీకేఎస్ సెంట్రల్ కమిటీ మెంబర్ ఈశ్వర్, ఫిట్ సెక్రటరీ పిచ్చయ్య, జి.ఎస్ శ్రీనివాస్, ఆంజనేయులు, బ్రాంచ్ సెక్రటరీలు చంద్రశేఖర్, తిరుపతి, అశోక్, పి.పి.రాజు, సాగర్, కాజా భక్ష, పూర్ణ తదితరులు పాల్గొన్నారు.

సమ్మె విజయవంతం కోసం విస్తృతంగా ప్రచారం చేయాలని, కార్మికుల్లో చైతన్యం కలిగించాలని నిర్ణయించారు. కార్మిక సంఘాల ఐక్యతే ఈ పోరాటంలో విజయం తెచ్చిపెడుతుందని నేతలు స్పష్టం చేశారు.