ఇద్దరు వ్యక్తులకు రెండేళ్ల జైలు శిక్షతోపాటు వెయ్యి రూపాయల జరిమానా విధిస్తూ తీర్పు

కొత్తగూడెం జిల్లా అదనపు అసిస్టెంట్ సెషన్స్ జడ్జి కర్నాటి కవిత సోమవారం (జూన్ 30) ఒక కీలక తీర్పు వెలువరించారు. యువతి త్రివేణి చావుకు కారణమైన ఇద్దరు వ్యక్తులకు రెండేళ్ల జైలు శిక్షతోపాటు వెయ్యి రూపాయల జరిమానా విధిస్తూ తీర్పు చెప్పారు.

కేసు వివరణ:

టేకులపల్లి మండలం కోయగూడెంకు చెందిన చెన్ను త్రివేణి 2014 అక్టోబర్ నెలలో దసరా పండుగ సందర్భంగా తన తల్లి ఇంటికి రామవరం వచ్చి, అనారోగ్యం కారణంగా దీపావళి వరకు అక్కడే ఉండింది. దీపావళికి ఐదు రోజుల ముందు, త్రివేణిని చూసేందుకు కూసుమంచి మండలం నాయకులగూడెం చెందిన ఎలియాస్ అలియాస్ ఎర్రబోయిన రామకృష్ణ, జాల శ్రీశైలం అక్కడికి వచ్చారు.

తన భార్య వదిలేసినదని చెప్పిన రామకృష్ణ, త్రివేణిని మాయమాటలు చెప్పి మానసికంగా బెదిరించి రామవరం సెంటర్‌కు, అక్కడి నుంచి రైల్వే స్టేషన్‌ ద్వారా తన ఇంటికి తీసుకెళ్లాడు. అయితే రామకృష్ణ అన్న యువతిని చూసి తక్కువగా చూసి వెంటనే పంపించమని చెప్పాడు. దీంతో ఖమ్మం బస్టాండ్‌కు తీసుకెళ్లి భద్రాచలం బస్సు ఎక్కించారు.

బస్సు కొంత దూరం వెళ్లిన తరువాత త్రివేణి బస్సు దిగి మళ్లీ ఖమ్మం బస్టాండ్‌కు చేరుకుంది. అక్కడ రామకృష్ణ, శ్రీశైలం లేకపోవడంతో మణుగూరుకు వెళ్తున్న బస్సులో అశ్వాపురం వద్ద తన పెద్దమ్మ ఇంటికి వెళ్లింది. అక్కడ తల్లి మందలిస్తుందన్న భయంతో భయభ్రాంతులకు గురై ఒంటిపై కిరోసిన్ పోసుకుని తగలబెట్టుకుంది.

విషయం తెలుసుకున్న తల్లి 108 అంబులెన్స్ ద్వారా భద్రాచలం ప్రభుత్వ ఆసుపత్రికి తీసుకెళ్లగా, అక్కడి నుంచి ఖమ్మం, అనంతరం కొత్తగూడెం ప్రభుత్వ ఆసుపత్రిలో చికిత్స పొందుతూ త్రివేణి అక్టోబర్ 31, 2014న మృతి చెందింది.

పోలీసుల దర్యాప్తు:

గవర్నమెంట్ ఆసుపత్రి సమాచారం మేరకు టూ టౌన్ ఎస్‌ఐ బి. రాజు త్రివేణి స్టేట్మెంట్ నమోదు చేసి 24.10.2014న కేసు నమోదు చేశారు. అనంతరం దర్యాప్తు పూర్తయిన తర్వాత రామకృష్ణ, శ్రీశైలం‌లపై చార్జ్‌షీట్ దాఖలు చేశారు.

తీర్పు:

న్యాయస్థానంలో మొత్తం 24 మంది సాక్షులను విచారించారు. వాదోపవాదాల అనంతరం న్యాయమూర్తి రామకృష్ణ, శ్రీశైలం‌లకు రెండేళ్ల కారాగార శిక్ష మరియు ఒక్కొక్కరికి రూ.1,000 జరిమానా విధిస్తూ తీర్పు చెప్పారు.

ప్రాసిక్యూషన్ పాత్ర:

ఈ కేసును అదనపు పబ్లిక్ ప్రాసిక్యూటర్ కె. రాజారావు న్యాయస్థానంలో ప్రాతినిధ్యం వహించగా, కోర్టు లైజాన్ ఆఫీసర్ ఎన్. శ్రీనివాస్, కోర్టు డ్యూటీ పీసీ మంగీలాలు సమర్థంగా సహకరించారు.

ఈ తీర్పు త్రివేణి కుటుంబానికి కొంతమేర న్యాయం జరిగిందన్న భావన కలిగించినప్పటికీ, మహిళల భద్రతపై సమాజం ఇంకా ఎంతో దృష్టి పెట్టాల్సిన అవసరం ఉందన్న విషయం మరోసారి హైలైట్ అయింది.