ఓఆర్‌ఆర్‌పై ఘోర రోడ్డు ప్రమాదం.. ముగ్గురి దుర్మరణం
మేడ్చల్‌ జిల్లా కీసర పరిధిలోని ఔటర్ రింగ్ రోడ్ (ఓఆర్‌ఆర్) పై ఆదివారం ఉదయం భయానక రోడ్డు ప్రమాదం జరిగింది. ఈ ఘటనలో ఒడిశా రాష్ట్రానికి చెందిన ముగ్గురు వ్యక్తులు అక్కడికక్కడే ప్రాణాలు కోల్పోయారు.
సమాచారం ప్రకారం, కీసర నుంచి ఘట్‌కేసర్ వైపు వెళ్తున్న ముగ్గురు వ్యక్తులు రోడ్డుపై నడుచుకుంటూ వెళ్తుండగా, వెనుక నుంచి వేగంగా వచ్చిన బొలెరో వాహనం వారిని ఢీకొట్టింది. ఢీకొన్న వేగం అంతగా ఉండటంతో ముగ్గురు గాల్లో ఎగిరి పడి, తీవ్ర గాయాలతో అక్కడికక్కడే మృతిచెందారు.
ప్రమాదం జరిగిన వెంటనే స్థానికులు, ప్రయాణికులు భయాందోళనకు గురై, వెంటనే పోలీసులకు సమాచారం అందించారు. కీసర పోలీసులు ఘటనాస్థలానికి చేరుకుని మృతదేహాలను పరిశీలించి, పోస్టుమార్టం నిమిత్తం స్థానిక ప్రభుత్వ ఆసుపత్రికి తరలించారు.
పోలీసులు బొలెరో వాహనాన్ని స్వాధీనం చేసుకుని, డ్రైవర్ పరారీలో ఉన్నాడని తెలిపారు. అతని కోసం గాలింపు చర్యలు చేపట్టారు. ప్రమాదంపై కేసు నమోదు చేసి దర్యాప్తు కొనసాగిస్తున్నట్లు అధికారులు తెలిపారు.
ప్రాథమిక సమాచారం ప్రకారం, మరణించినవారు వలస కూలీలుగా హైదరాబాద్‌లో పనిచేస్తున్నారని, పనులు ముగించుకుని నివాసానికి తిరుగుతున్న సమయంలో ఈ ప్రమాదం జరిగినట్లు తెలుస్తోంది.
Post a Comment