శంషాబాద్ విమానాశ్రయంలో 14 కోట్ల గంజాయి స్వాధీనం అదుపులో ప్రయాణికుడు

హైదరాబాద్: సెప్టెంబర్ 10: రాష్ట్ర రాజధాని షామ్షాబాద్‌లోని రాజీవ్ గాంధీ అంతర్జాతీయ విమానాశ్రయంలో భద్రతా సిబ్బంది పెద్ద ఎత్తున గంజాయి పట్టివేత చేశారు. బుధవారం ఉదయం బ్యాంకాక్‌ నుంచి హైదరాబాద్ చేరుకున్న ఓ ప్రయాణికుడి సామాను తనిఖీ చేసిన అధికారులు దాదాపు 13.9 కిలోల గంజాయిని కనుగొన్నారు. స్వాధీనం చేసిన ఈ నిషేధిత మందుల విలువ మార్కెట్ ధర ప్రకారం సుమారు రూ.14 కోట్లు ఉంటుందని అంచనా.

అనుమానాస్పదంగా కనిపించిన ఆ ప్రయాణికుడిని ప్రశ్నించగా, అతని పేరు హైదరాబాద్‌కు చెందిన సయ్యద్‌ రిజ్వీ అని తెలిసింది. వెంటనే అతడిని అదుపులోకి తీసుకుని కస్టమ్స్ అధికారులకు అప్పగించారు. ఈ కేసు సంబంధించి లోతైన దర్యాప్తు కొనసాగుతోందని భద్రతా వర్గాలు వెల్లడించాయి.

డ్రగ్స్ రవాణాను అరికట్టేందుకు తెలంగాణ ప్రభుత్వం ఈగిల్‌ టీమ్స్ ఏర్పాటు చేసి పటిష్ట చర్యలు తీసుకుంటున్నప్పటికీ, తరచుగా గంజాయి, సింథటిక్ డ్రగ్స్ కేసులు వెలుగుచూడటం ఆందోళన కలిగిస్తోంది. ఇటీవలే ముంబై క్రైమ్ బ్రాంచ్ పోలీసులు హైదరాబాద్‌లో రూ.12వేల కోట్ల విలువైన డ్రగ్స్ పట్టుకోవడం ఈ సమస్య వ్యాప్తిని స్పష్టంగా చూపిందని నిపుణులు అభిప్రాయపడుతున్నారు.

అధికారుల అంచనా ప్రకారం, అంతర్జాతీయ రవాణా మార్గాలను వినియోగిస్తూ డ్రగ్ మాఫియాలు కార్యకలాపాలు కొనసాగిస్తున్నాయి. దీనికి అడ్డుకట్ట వేసేందుకు రాష్ట్ర, కేంద్ర భద్రతా సంస్థలు మరింత అప్రమత్తంగా ఉండాల్సిన అవసరం ఉందని స్పష్టమవుతోంది.