6 వేలు లంచం తీసుకుంటూ ఏసీబీ చిక్కిన ఉస్మానియా యూనివర్సిటీలో ఏఈఈ

హైదరాబాద్, తార్నాక: ఉస్మానియా విశ్వవిద్యాలయ ప్రాంగణంలో చేపట్టిన పునరుద్ధరణ పనులకు సంబంధించిన బిల్లుల విడుదల విషయంలో లంచం డిమాండ్ చేసిన అధికారిని తెలంగాణ అవినీతి నిరోధక శాఖ (ACB) అధికారులు రెడ్‌హ్యాండెడ్‌గా పట్టుకున్నారు.

వివరాల్లోకి వెళ్తే… ఫిర్యాదుదారుడు గుత్తేదారునిగా ఉస్మానియా యూనివర్సిటీ ప్రాంగణంలో చేపట్టిన పనులకు సంబంధించి రూ.7,37,034 విలువైన బిల్లులు మంజూరు చేయడం, అలాగే భవిష్యత్తులో కాంట్రాక్టు పనుల్లో ఎలాంటి ఆటంకాలు కలిగించకుండా ఉండేందుకు గాను బిల్డింగ్ డివిజన్‌కు చెందిన ఉప కార్యనిర్వాహక ఇంజనీరు (AEE) రాకొండ శ్రీనివాసులు రూ.11,000 లంచం డిమాండ్ చేసినట్లు ఆరోపణలు ఉన్నాయి.

ఈ క్రమంలో ఇప్పటికే రూ.5,000 లంచంగా తీసుకున్న ఆయన, మిగిలిన రూ.6,000 తీసుకుంటున్న సమయంలో తెలంగాణ ఏసీబీ అధికారులకు చిక్కారు. ఈ ఘటన హైదరాబాద్ తార్నాకలోని ఉస్మానియా విశ్వవిద్యాలయ ప్రాంగణంలో చోటుచేసుకుంది. ఏసీబీ అధికారులు కేసు నమోదు చేసి దర్యాప్తు కొనసాగిస్తున్నారు.