ప్రభుత్వ ఉద్యోగులకు రేవంత్ రెడ్డి సర్కార్ భరోసా!

హైదరాబాద్, జనవరి 10 : తెలంగాణ రాష్ట్ర ప్రభుత్వ ఉద్యోగులకు రేవంత్ రెడ్డి ప్రభుత్వం భారీ ఊరటనిచ్చే శుభవార్త అందించింది. ఉద్యోగుల సంక్షేమమే లక్ష్యంగా డిప్యూటీ ముఖ్యమంత్రి భట్టి విక్రమార్క శుక్రవారం కీలక ప్రకటన చేశారు. రాష్ట్ర ప్రభుత్వంలో పనిచేస్తున్న సుమారు 5.14 లక్షల మంది శాశ్వత (పర్మినెంట్) ఉద్యోగులకు రూ.1.02 కోట్ల విలువైన ఉచిత ప్రమాద బీమా పథకాన్ని త్వరలో అమల్లోకి తీసుకురానున్నట్లు ఆయన వెల్లడించారు.

ఉద్యోగుల కుటుంబాలకు ఆర్థిక భరోసా కల్పించడమే ఈ నిర్ణయానికి ప్రధాన ఉద్దేశమని డిప్యూటీ సీఎం స్పష్టం చేశారు. శుక్రవారం మీడియాతో మాట్లాడుతూ, ఈ పథకం కేవలం ప్రకటనలకే పరిమితం కాకుండా క్షేత్రస్థాయిలో సమర్థవంతంగా అమలు చేసే దిశగా ప్రభుత్వం ఇప్పటికే ప్రముఖ బ్యాంకింగ్ సంస్థలతో విస్తృత సంప్రదింపులు జరిపిందని తెలిపారు.

రాష్ట్రం ఆర్థిక సవాళ్లను ఎదుర్కొంటున్నప్పటికీ, ప్రజా ప్రభుత్వం ఉద్యోగుల సంక్షేమానికి అత్యంత ప్రాధాన్యత ఇస్తోందని భట్టి విక్రమార్క పేర్కొన్నారు. గత ప్రభుత్వ హయాంలో పేరుకుపోయిన బకాయిలను తమ ప్రభుత్వం అధికారంలోకి వచ్చిన తర్వాత ప్రతి నెలా క్రమం తప్పకుండా విడుదల చేస్తూ వస్తున్నామని ఆయన గుర్తు చేశారు. జీతాల చెల్లింపుల్లో జాప్యం లేకుండా చర్యలు తీసుకుంటూ, పదవీ విరమణ ప్రయోజనాలు, ఇతర అలవెన్సులను కూడా సమయానుకూలంగా సర్దుబాటు చేస్తున్నట్లు తెలిపారు.

ఈ ప్రమాద బీమా పథకం ద్వారా విధి నిర్వహణలో గానీ, ఇతర అనుకోని ప్రమాదాల్లో గానీ ఉద్యోగి దురదృష్టవశాత్తూ ప్రాణాలు కోల్పోతే, ఆ కుటుంబం ఆర్థికంగా వీధిన పడకుండా కాపాడటమే ప్రభుత్వ లక్ష్యమని డిప్యూటీ సీఎం వివరించారు.

ఇప్పటికే రాష్ట్రంలోని కీలక రంగాల్లో పనిచేస్తున్న ఉద్యోగులకు ఇలాంటి కోటి రూపాయల బీమా రక్షణ అమలులో ఉందని ఆయన తెలిపారు. సింగరేణి కాలరీస్‌లో పనిచేస్తున్న 38 వేల మంది రెగ్యులర్ కార్మికులు, అలాగే విద్యుత్ సంస్థల్లో విధులు నిర్వహిస్తున్న 71,387 మంది ఉద్యోగులకు ఇప్పటికే ఈ ప్రమాద బీమా వర్తిస్తోందని చెప్పారు.

అదే తరహాలో, సాధారణ ప్రభుత్వ శాఖల్లో పనిచేస్తున్న 5.14 లక్షల మంది ఉద్యోగులకు కూడా రూ.1.02 కోట్ల ప్రమాద బీమాను త్వరలో ప్రారంభించనున్నట్లు ప్రకటించారు. ఈ నిర్ణయంతో రాష్ట్రవ్యాప్తంగా లక్షలాది ప్రభుత్వ ఉద్యోగుల కుటుంబాలకు సామాజిక భద్రత మరింత బలపడుతుందని ప్రభుత్వం భావిస్తోంది.